Gioghende a sa faddina

Gioghende a sa faddina

S’Olbia pro como suffrit s’aera de s’altura e torrat a s’adde lontana, cussa de basciu. Dae sa tuccada amus bidu sos pisseddos gadduresos oriolados e un’atzigu istracos, poveros de ideas e giogu.

S’Imolese faladat in campu in chirca de mantenere su controllu de su giogu, no at sueradu pius de tantu pro bi resessire e a trampare sos meres de domo, cando si sunt pagu, pagu abucallotados…

A su minutu 15, cando Arboleda colat a s’ala destra, cun sa fortza e sa lestresa chi totu li connoschimus, donat una bocia intro s’area minore, chi Ragatzu che devet solu ispinghere intro sa rete. Ma non b’arrivat e sa bocia giumpat sa porta a parte ‘e foras. Passant solu 8 minutos e Daniele Ragatzu retzit un’atera possibilidade pro ch’essire dae su 0-0, de conca custa orta, solu cun sa porta abberta, sa boccia carignat sa linna de su palu e ch’essit a foras.  Paret una marrania. E s’Imolese bessit a dae sa mesania sua e comintztat a si faghere a bidere. Lella sarvat sa porta sua cund’unu recuperu miraculosu a su minutu 25, dae Benedetti chi lestru fit acurtziende sa porta. 

Dae su corner chi sighit naschet sa prima rete imolesa, Matteo Angeli classe 2002, si faghet logu in sa mesania de s’area e de destru isbatzinat intro sa rete. Nudda potet Ciocci. E su giovanu imolese, solu pagos minutos infatu sarvat sa porta sua dae rete segura. Est galu su minutu 31 cando Giandonato inventat unu diagonale perfetu pro Ragatzu, chi lestru fuit in mesu e aria, driblat su portiere e isbatzinat a porta boida. Angeli si faghet anghelu de sa porta sua e la sarvat. Sa bocia pariat passende sa linea de sa porta e no paret beru. Su giovanu at violadu sa porta olbiesa e passados pagos minutos sarvadu sa sua. Tando su giogu comintzat a allentare, a parte carchi fuina de Idoh, in die de gratzias, Olbia no b’est. E s’iscuadra de Fontana leat coragiu e profitat. Est su minutu 35, cando Benedetti fuit a manca, rupat s’area a sa sola e faghet sa segunda, gelende su publicu. Pustis nudda o guasi, cun pagas emotziones tancamus su primu tempus. S’isperu est chi su segundu potat essere metzus.

In su segundu, sos piseddos bogant sa balia ma su giogu paret bandidende. Bintrant forzas friscas, Mancini pro Biancu, Palesi in su logu de Chierico e Pisanu torrat in campu pro Arboleda e s’olbia che tancat sos imolesos intro s’area issoro.  E sa rete paret in s’aera, dae unu mamentu a s’ateru, ma tando bogat sa chi si narat classe, su portiere Melgrati, ch’impedit retes fatas cun paradas meravitzosas, prima Ragatzu partit dae manca e s’inventat un assist de oro pro Occhioni chi dae duos metros, al volo no agat sa porta e pustis Mancini, chi dae su limite de s’area, si faghet su logu e isbatzinat. Paret rete fata, ma Melgrati la deviat cun sa punta de sos poddighes, no si cumprendet comente. Est su minutu 78. Passat unu pajiu e minutos e bi proat Udoh, chi si liberat in mesania de s’area e dat una resoltzada, ma isse b’est, semper Melgrati.

S’Olbia sighit a bi proare cun sa fortza de su disisperu e a su minutu 97, Emerson bogat a pizu su lanciu de 50 metros, sa bocia benit domada dae Mancini chi chircat s’eurogol cund’unu paloneto, ma sighit a no agatare sa porta, in una partida sinnada, de ammentare pro imparare dae sas faddinas e de immentigare puru pro torrare a gherrare cun su coragiu e sas ideas chi sos piseddos ant mustradu fintzas a deris.

Mario Bua, Amistade