Olbia a sa riscossa!

Olbia a sa riscossa!

Sos biancos bogant sa balia connota e binchent cun meritu  in domo de su Montevarchi. 

S’Olbia tuccat comente si devet e Palesi chircat sa porta de su Montevarchi duas bortas, cumbidadu a isbatzinare dae Ragatzu chi dae s’ala destra faghet a timire sos meres de domo, a su minutu 4 e 15.

Su Montevarchi proat a rispondere bene abbaidos dae sa difesa gadduresa, attenta a no lassare logu a su desitzu montevarchino de s’accurtziare a Ciocci. Mas montevarchinos cumprendent bene chi oe no potet burlare, cando Ragatzu e Lella si faghent meres de s’ala destra. Est su minutu 25, Lella servidu dae Ragatzu, giompet lestro intro a s’area e donat un’assist magicu a Biancu chi chentza bi pensare meda isbatzinat al volo e leat su palu pienu. Su bardianu Inardi nudda potiat, solu abbaidare, frimmu…

Rispondet su Montevarchi e impignat Ciocci a su minutu 42, ma su bardianu nostru si faghet agatare prontu. Pagu pro un’iscuadra chi at bisonzu de puntos e s’Olbia in contropiede sighit a faghere a timire e a punghere cun santa rejone. Est su minutu 44, cando Biancu donat un assist diciosu a Udoh, chi lestru che su leone si giogat sa difesa, imbadinat su bardanu sou cund’una finta de destru e cun su pes manchinu trampat Inardi, chi ateru no potet faghere che accogliere sa bocia dae intro a su saccu. 

E su primu tempus tancat cun s’Olbia chi chircat sa segunda rete, lassende logu a un’isperu mannu.

Su segundu tempus mustrat chi sos gadduresos no sunt bintrados in campu pro difendere sa rete balanzada in su primu e King Udoh de conca torrat a assuconare su portiere montevarchino, cund’una isconchinada centrale. Ma chie devet comprendere, lu fatat.

Su Montevarchi mantenet sa bocia e atacat a conca bascia, ma chie s’acurtziat a sa rete est semper de pius s'Olbia. Biancu inventat un’assist nou pro Udoh, chi bida sa porta isbatulat una resoltzada. Sa bocia carignat su palu ‘e linna. Est su minutu 51. Sa balia de sos piseddos carrat bonos pensamentos. 

Su mastru montevarchino mudat mes’iscudra in campu desitzende su paregiu, ma su risultadu abbarrat e a su minutu 62 Travaglini profitat de sa crisi carrada in area dae su corner de Emerson e a bolu che girat sa bocia in rete. Est festa manna cun sos cumpantzos.

Su Montevarchi sighit a gherrare pro aberrere sa partida cund’una rete, ma Ciocci est bardianu bonu e sa difesa mantenedet bene sa pressione. Tando King Udoh lanciadu dae ragatzu chi fuit a destra, mandighendesi su 3-0. Pro pagos centimetros no leat sa bocia in ispaccada. Semus a su minutu 90 e chimbe minutos de recuperu no bastant a sos meres de domo, pro evitare sa perdida ch’at a abarrare in sa memoria, pro chie at perdidu e pius de totu pro chie at binchidu.

Olbia pustis a duas perdidas fatu a s’atera, potet abbaidare a su tempus benidore cun animu nou, cumbinchidos de si la potes giogare semper e in donzi logu, comente preigat Mastru Canzi.

Mario Bua, Amistade