Onore a sos binchidores

Onore a sos binchidores

Issos sunt pius fortes, ma malas faddinas de sos piseddos nostros ant ajuadu sa fortza manna de s’iscuadra modenesa. Mosti, Pergreffi, Gerli, Ogunseye (bene connotu in custas trampas), Minesso e medas ateros, pariant feras, fatu a Ciocci, prontas a si lu mannigare biu.

Su Modena at giogadu cun sabiesa tatica, pallegiu, tecnica totu fatu cun lestresa manna e balia immentigada dae sos gadduresos, istracos dae tres partidas ind’una chida, bisonzosos de pasare e forsis de turnover.

Sunt bastados 9 minutos a sos istrantzos pro bidere su tribagliu issoro premiadu. Un’isbatzinada de Gerli chi rupada s’area manna no lassat iscampu a su bardianu de sa porta nostra. Su Modena sighit a atacare chena pasu e a faghet timire su campu intreu, ma su coro ‘e s’Olbia no si lassat domare e pianu, pianu sos piseddos proant a balantzare terrinu, puru si cun fadiga manna. Totu indebadas, a su minutu 26, King Udoh perdet animu e sabiesa, leadu unu colpu malu si lassat andare a una reazione criadurina. Su bugliete est ruju e gasi lassat son cumpantzos in deghe, a gherrare cont’a unu carrarmadu a pius de un’ora dae sa fine. E no che passat tempus meda pro Modena a achivire su 2-0. Giovannini si lassat s’omine e bolat intro area, appetigadu  dae Chierico, assuconadu male. E s’arbitro potet solu frusciare. Tirat su rigore s’ex Ogunseye, Ciocci si tufat a destra, tocat sa bocia ma no parat e semus a su minutu 39. Ogunseye faghet paga festa. 

Ma s'Olbia no si lassat domare, mai. E cun sa fortza de su disisperu torrant a s'acurtziare a sa porta’e Gagno. Palesi retzit un’assist dae Ragatzu, rupat sa difesa modenesa, inue carcunu deviat cun sa manu. S’arbitro bidet solu su corner. Unu minutu in fatu a sue 41, Lella fuit lestru a s’ala destra, rupat s’area, bessit Gagno e resessit a respinghere, ma no mantenet bene sa bocia, balanzada dae Ragatzu chi puntat deretu sa porta chena bardianu. Gagno ateru no potet faghere che a l’imbolare a terra pro impedire su passatzu. Est rigore, perunu dubiu. Ragatzu angulat bene, su tiru est bellu e potente. Gagno bolat che anghelu e faghet su miraculu, cund’una parada mai bida innanti, in custas trampas. Tando sa die paret sinnada. 

Tuccat su segundu tempus e passados duos minutos su Modena bi torrat: 3-0. Punitzione de Mosti dae manca, Ogunseye faghet de ponte cun sa conca a Scarsella, chi solu in sa mesania de s’area no perdonat. E su Modena sighit a atacare sa porta ‘e Ciocci, pro totu su segundu tempus, chena pasu, in chirca de sae battoro. Ma forsis nono. 

Isetamus disanimados su frusciu de s’arbitro, carchunu incomintzat a recuire a domo sua, cando totin’unu s’allumat una lughe noa: Occhioni furat bocia in difesa e lestru che lepere si faghet logu a manca, semper a conca alta bidet Mancini liberu e li lassat sa trama de s’atzione. Mancini a bolu servit Demarcus, li ponet sa bocia in pes cun lanciu pretzisu cantu pretziosu. Demarcus mantenet bene meda sa bocia, si lassat s’omine sou insegus e isbatulat cun fortza de destru. Gagno su bardianu s’abbaidat sa bocia carignende su palu e bessendeche a foras.

Duos pitzinnos de su vivaiu gadduresu narant chi s’isperu no morit mai...a metzus bidere!

Mario Bua, Amistade