Sa maleiscione de sos últimos minùtiles

Sa maleiscione de sos últimos minùtiles

Átera befa pro s'Olbia, chi giompet a s'aparinada ma afundat a ultimera.

Canzi ponet in campu pro sa prima borta Van de Want, in dainnanti de isse Pisano, Brignani, Emerson e Travaglini, in mesania Lella, Chierico e Giandonato. Trescuarteri Biancu cun Mancini in atacu e Ragatzu a costazu sou. Carchi cambiamentu duncas, pro contierrare unu Siena chi non binchet in domo sua dae guasi unu mese. 

Sos nostros partint bene: luego Biancu ischirchinat, ma míriat altu. A su de 7 minùtile, tiru traessu de Giandonato, chi resultat bàsciu, tando Ragatzu colpit de carcanzu, su portieri senesu Lanni imbolat a fora. Su Siena faghet sa gioghera, cun sos ómines de Canzi ábiles a partire in contra-giogu. A su de 15, sa defesa bianca in bessida perdet una bocia perigulosa, tiru de Varela, ma andat a fora. Tres minùtiles a pustis, Caccavallo ischirchinat dae una trintina de metros, ma chentza éssere perfetu. Unu giru de rellozu, e semus a s'átera parte: Emerson dae sa banderedda, pro Biancu chi brincat bene ma intzichit male.

A su de 22 est su Siena chi batit dae su corru. Su portieri nostru faddit sa bessida, ma b'est Emerson chi salvat in sa linea de porta, cun Terigi chi fit cue, prontu a pónnere intro. A su de 28, Ragatzu dae punitzione impignat Lanni, chi si imbolat pro bogare a fora una bocia velenosa. A su de 36 bi torrat a proare Caccavallo, su menzus de sos toscanos, ma Van der Want ponet a fora a sa dresta sua. S'última falada innanti de su pasu est de s'Olbia. Giandonato ponet bene pro Brignani a su de 42, ma su defensore terranoesu colpit male e salvat su Siena. Daboi de unu minùtile de tempus annantu, s'árbitru mandat sos vinti-duos a su recreu.

A sa represa de sa gara, posca de 4 minùtiles sos senesos colant: Disanto dae sa manca, fuit a Pisanu e colpit bene de traessu, inferchende Van der Want in s'áteru palu. S'Olbia est intumbida, e tres minùtiles a pustis subischet s'addòpiu: est Caccavallo chi betat su tiru a giru dae dresta, detzidit su tocu de Emerson chi mintet in sa porta sua. Pro fortuna est lestru s'arrempellu de sos biancos: a su de 56, Giandonato ponet in s'áera dae sa banderedda, iscònchinat Brignani e torrat a abbérrere sa gioghera. Canzi bi creet e a su de 62 mintet in campu Udoh pro Mancini, e Simone Pinna pro Pisano, chi at giogadu cun una fascia méiga in conca. E est pròpiu s'italu-nizerianu chi giompet a s'aparinada: a su de 68, fuit pilu pilu a su fora-giogu pro tènnere unu passazu abbistu de Chierico e pienat sa porta senesa, antecipende Lanni cun unu tocu dae suta. Est sa prima rete de s'Olbia dae parte de unu intradu a gara comintzada!

Tres minùtiles a pustis, Palesi leat su postu de Biancu. E a su de 78 Canzi ponet in campu La Rosa e Occhioni pro Chierico e Giandonato. Su Siena tentat sa carta sarda: a su de 80 intrat in su retàngulu birde Istèvene Guberti, de Villamassargia. A su de 81, Var de Want si pagat sa zorronada: Di Santo faghet sa colora in s'áera sarda, sa bocia fùrriat in segus a Caccavallo, ma su toscanu acatat unu muru in su portieri olandesu chi salvat sa porta sua. Tres minùtiles e Di Santo si ponet a contu sou, ma faddit su tiru, chi bessit a fora.  A su de 86 Occhioni est aterradu in s'áera senesa, s'árbitru nachi non b'at nudda e lassat cúrrere, chena intendere sas chéscias de sos cadduresos. Ma sa befa pius manna est a s'últimu giru de rellozu: sos biancos sunt postos male in defesa a dresta, su sardu Guberti passat a Favalli chi chena istrobbu perunu ponet in áera unu tiru traessu, Karlsson tocat e pienat su sacu. 

Colant 4 minùtiles de recùperu ma non sutzedit nudda e s'Olbia che torrat in Sardigna cun un átera mala brulla finale. Oramai non si contant pius sos puntos pérdidos in congruida de gara. Canzi at ite tribagliare pro che catzare custa maladia a sos ómines suos. Ca pius andat su tempus e pius devenint graes sos puntos frundidos in custa manera!

Roberto Mette, Amistade