A Pesaro mele ranchidu chei su fele

A Pesaro mele ranchidu chei su fele

Cun su Pontedera amus binchidu chena brillare meda, contr’a sa Vis Pesaro sos sardos ant guidadu su giogu cun diciosa autoridade, mancari fora ‘e domo, mancari manchende Ragatzu,  faddende sa rete, cun Pinna, Travaglini, Biancu e la Rosa, pro meritu mannu de su bardianu de domo Farroni, ma de sa mala sorte puru.

Forsis aimus potidu accabbare sa partida in su primu tempus, ma sa fubbal est su giogu de sa vida e in sa vida “Su chit’erat no torrat mai…”.

Gasì in su segundu tempus sa musica incomintzat a mudare. Sos marchigianos cumprendent chi sa sorte no est in cussu campu meda amiga de sos sardos e tando creschent s’isperu, cun animu nou, carrende oriolos a sa defesa ‘e s’Olbia, chi puru defendet bene, tanchende su logu innanti a Van Der Want, inue Emerson bessit a pizu che unu Gigante de Monte Prana.

Ma a su minutu 21, de su segundu tempus Gucci de conca trampat Van De want. S’arbitru narat chi nono, ca s’atacante s’est ajuadu cun sa manu. S’avisu est mannu e nodidu però.

S’Olbia rispondet bene, Udoh binchet sa lutta cun Gavazzi, unu de sos temas de interessu mannu de sa partida, isbatzinat a tota fua da su limite ‘e manca de s’area, ma Farroni b’est semper e li tancat sa porta, balantzende sa pramma de metzus in campu.

Sa Vis tando mudat su tempus de sa partida gratzias puru a sos cambios cumbinados dae Banchini, su mastru de domo. Marcandella lanciat su giavanu sitzilianu Cannavò, chi che brincat a Boccia, friscu e lestru si buffat sa defesa sarda e trampat Van de Want in bessida disisperada.

S’Olbia no s’arrendet mai, s’arbitru negat unu rigore a Emerson, toccadu cando fit prontu a liberare su manchinu sou inintro a s’area e annullat sa rete ‘e Udoh, ma cussa fit in fuorigioco.

Sos sardos mancari chena Ragatzu, munstrant balia e sabiesa ‘e giogu superiores a sos meres de domo, ma perdent sa partida. “Su fele est mannu a beru. In serie C no si potent faddire tantas retes…”, narat Mastru Canzi.

Mario Bua, Amistade