Olbia tosta in defesa ma chentza pùnghere

Olbia tosta in defesa ma chentza pùnghere

Gioghera arressa deris a serentina in su Nespoli. Canzi mìsciat sas cartas, ma s'assu non essit.

Sos biancos falant in campu cun Van der Want portieri, sa linea de defesa cun Emerson, Boccia, Brignani, mesania frommada dae Travaglini, La Rosa, Lella, e Simone Pinna. Atacu cun Biancu, Udoh, Ragatzu. Unu 3-4-3 curiosu, in ue Travaglini e Pinna si dispartint intra segunda e tertza linea, Biancu diat éssere trescuarteri ma pius de sas bortas si ponet in linea cun Ragatzu e Udoh. 

La Rosa si muntenet pasidu in daesegus, e Lella devet cùrrere pro duos in una mesania chi andat mai-cantas bortas in minoria. Epuru sa cuntesa est blocada pro paritzu tempus e sas ocasiones de rete sunt minguentes.

A su de 12, sonat sa prima trumba sa Fermana chi batit dae sa banderedda, bòcia a Graziano chi tirat dae fora, tzentrale e debile, parat Van der Want. In su de 14, Ragatzu illughinat cun una giogada de immostre, liberat e faghet cùrrere Travaglini a cherra a s'áera, chi benit aterradu innanti de intrare-bi. Batit sa punitzione Ragatzu deretamente a porta. Parada a terra de Ginestra. Minùtile 20, Cognigni, chircadu cun tiru traessu dae manca, de conca míriat a sa dresta de Van der Want, chi s'istiriolat e respinghet. 

A su de 27, sa pius bella falada de s'Olbia: traessale de Emerson dae dresta, Ragatzu che una fera giompet a sa bòcia e isfortigat in mesu de áera, Lella cun prepoténtzia ischírchinat de conca e unfiat sa rete. S'arbitru non cuntzedit su gol pro fora-giogu de s'atacante cuartesu. Sa gioghera paret si siat inchesa, in bonora: Travaglini coglit in áera un tiru traessu dae dresta, dat borta a cherra a intro e luego intzichit. Ma est débile e Ginestra blocat sa bòcia chentza anneu. 

A su minùtile 34 punitzione de sa Fermana, dae dresta, su numeru 77 grogu Pannitteri betat in áera ma colpit male, parat su portieri olandesu de s'Olbia. Duos giros de rellozu e s'Olbia batit dae sa banderedda, in áera Travaglini leat unu corpu pagu lítzidu, ma s'arbitru frúsciat contra a isse. 

Tancat su primu tempus sa Fermana chi a su de 41, dae su corru de manca imbolat, in mesu áera, sa defesa bianca líberat, insistint sos grogos, torra cun tiru traessu, resolvit bene Van der Want. Ateros bàtoro minùtiles e si andat a su reposu cun ambas duas iscuadras a sicu. 

A sa torrada in campu, sa musica non cambiat. S’ andamenta est lena lena e non caentat su coro de sos infritolidos sustenidores terranoesos. A su de 53, punitzione de Emerson dae dresta, Ginestra parat a manos altas.

Ocasione colossale pro sos ómines de Canzi a su de 63: Lella imbucat Travaglini chi falat repentinu in s'oru de manca, tiru traessu chi sa defesa marchisana ponet a fundu de campu. Tiru bene sestadu dae su corru mànchinu pro Simone Pinna ismentigadu a dresta dae totu sa defesa de sa Fermana. Mancari solu e a tretu de colpire bene, su defensore nostru faddit sa míria e si màndigat sa pius símplice de sas ocasiones.

Si mustrant perigulosos sos marchisanos puru. Duos tiros sighidos dae sa banderedda, innanti dae su corru de dresta, daboi dae cussu de manca. Cognigni - imbucadu dae Graziani - s'acatat a cara a pare cun su portieri terranoesu, ma non agantzat sa bòcia. Semus a su de 72 minùtile.  Como sos furisteris parent padronos de sa gara, daghì sos biancos sufrint in mesania, in ue Lella est istracu e azigu nervosu, impespadu de continu dae Graziani.

A su de 77 s'Olbia batit dae sa banderedda ma sa Fermana líberat cun paga fadiga. Canzi detzidit carchi cambiu: intrant Renault e Palesi, lassant su campu Pinna e Travaglini. A levellu tàticu non mudat nudda. E sa Fermana bi proat: áteru tiru dae su corru a su de 80: Blondet a bolu ponet fora de paga mesura. Tres minùtiles a pustis e Renault faghet una bella frimmada de bòcia in su lanciu traessu de Brignani, su defensore marchisanu lu aterrat. Batit sa punitzione Ragatzu ma est tropu debile e Ginestra blocat. Luego un ateru cambiu pro s'Olbia: lassat sa cuntesa Biancu, forsis su pius intumbidu dae una tática de giogu chi ancora non li deghet. Li dat su cambiu Belloni. 

A su de 88, últimos duos cambios pro Canzi: essit su tzentrale de atacu Udoh, a postu sou in campu su longarone Mancini; a fora Lella pro Pisano. Palesi andat in mesu, lassende sa fascia mánchina a su campidanesu. S'arbitru acordat ses minùtiles de tempus annantu, ma sa gioghera andat a mórrere a daju a daju. Etzi su tempus de bìdere unu lanciu traessu faddidu malamente dae Renault, e unu tiru de Sperotto chi finit a chelu, e s'arbitru frusciat tres bortas.

S'Olbia bida contra a sa Fermana est pàrfida pius achilibrada e difatis como leat pius pagas retes. S’atacu però si devet agualare a su modulu nou, chirchende de acatare maneras noas pro èssere perigulosu. Una manna ermosura est Boccia: in mesu a sa defesa non tremat unu mai, essit semper distintu, seguru e paret apat esperèntzia de annos e annòrios. Faula paret a nàrrere chi at 20 annos ebbia e est a sa prima istajone de professionismu!

Roberto Mette, Amistade