Istedda dae chelu pro s’arvure ‘e Nadale

Istedda dae chelu pro s’arvure ‘e Nadale

Sos sardos mancant de duos omines pesudos in defesa, comente Boccia e Emerson ma mustrant luegu sos dentes, fattende a bidere chi s’iscuadra est giompende a unu giogu e un’identidade chi no depent pius dae sos singolos solu.

E a su sestu minutu potet già passare: su tiru de Biancu agatat prontu Crespi, su bardianu ‘e domo chi no recessi a prendere sa boccia, tando bi proant Renault dae manca e Pinna dae destra, cun paga sorte. A rete faddida sighit semper cussa leada. Che colant solu duos minutos, dae sa punta e sa bandela, Santoro lampadat in s’area minore unu cross velenosu, Ubaldi, cun d’una mesa revoltida a bolu no perdonat Van der Want. Su minutu est sue otto e sa partida tuccat in pigada.

Sa reassione ‘e s’Olbia no istentat a accudire ma su giogu, bonu in sas ideas, curret pagu pretzisu e giompet solu a unu muntone de corner chena cabu. Sa Pistoiese in contrapiede sighit a minettare sae duos, cun pagu tribagliu pro su bardianu olbiesu però. Crispi puru toccat pagas boccias in d’unu primu tempus pagu lughente, cando Udoh accoglit unu de sos tantos cross e de conca che brichat su bardianu, unfiende sa rete, ma sa bandela de su sinnalineas est già alta pro sinnare s’ outside. S’arbitru frusciat e accabbat su primu tempus, cumbidende totus a pasare. Sos sardos sunt sutta de una rete. 

Su segundu tempus incomintzat chena cambios, ma pustis de chimbe minutos totu mudat: Ragatzu domat sa boccia cun sa classe connotta, galana la crossat in sa mesania de s’aria, Lella che pigat a chelu. S’isconchinada sua attambainat  su bardianu toscanu, chi abbaidat sa boccia pasendesi durche sutta s’abboju ‘e sos palos. Isse pariat unu pagu foras de logu, ma perunu bardianu aiat potidu tennere cussa boccia. 

Tando sa partida torrat in sa neula de sa mesania ‘e su campu. Ambos mastros imbiant totu sos cambios dae sa panchina in sa chirca de unu raju ‘e lughe. Accudit solu su colore ruju, chi s’arbitru donat a Renault a pro dopiu ammunidu, a su minutu 75. Est tando chi s’Olbia mustrat a sos meres de domo balia e carattere, giompende a su minutu 94 in paridade, cun su sufferentzia emmo, ma puru sighende a giogare in deghe pro binchere sa partida. B’at sinnos de interessu mannu. Su 2022, forsis carrat unu destinu diciosu pro sos sardos de Gaddura.

Bonas Pascas de Nadale a totus, cun saludu e trigu!

Mario Bua Capitta, Amistade