S'Olbia balanzat una puntu pretziosu

S'Olbia balanzat una puntu pretziosu

Olbia mantenet bene su campu e ammasetat sos canarinos marchigianos chena meda oriolu, ma sa siccagna in attacu no s’appasigat, cando nos acurtziamus a sos 500 minutos chena intendere su nùscu de sa rete.

Sa fermana paret iscuadra de bonu zèlu e proat a aberrere sa defesa terranoesa, pius de totu dae manca cun Pinzi e s’ex Giandonato, ma si cumprendet puru pruite che sunt falados in serie D s’annu passadu: una orta e bia issos resessint a caentare sas manos de Gelmi, semper cun Pinzi, su pius perigulosu. Est su minutu 69.

Olbia faghet carchi cosa in pius de sa contra, semper e solu cun Ragatzu, chi mustrat  in terra antzena puru, pruite isse aiat potidu galu giogare in series superiores. Ma isse  preigat a sa sola e a bortas in s’iscuru. A su minutu 41 fuit a sa sola, servidu dae Emerson in sa linea ‘e sa mesania, si buffat mesa defesa e accudit solu innanti a Nardi, bardianu de sa Fermana, ma ispostu s’alenu Ragatzu no resessit a donare balia a su tiru e Nardi potet parare.

In su segundu tempus Pinzi faddit sa liberada, de conca che torrat sa boccia insegus. In area s’allumat una mischia, Ragatzu si lampat comente unu falchittu, resessit puru a mantennere bascia sa boccia, ma su bardianu resessit in carchi manera a giompere a sa boccia e deviare s’isbatzinada in corner. Fit su minutu 36. Ma no finit incue: noe minutos infatu, semper Ragatzu accoglit una boccia longa ischijinada dae La Rosa, la domat cun maestria e la donat allumende s’iscuru, a Contini chi si liberat in area cun totu s’ischire sou, ma agattat unu muru in porta, fraigadu dae Parodi e Nardi. Mancaiant solu duos minutos a su novantesimu minutu.

A partida finida, cando s’apparinada accuntentat a totu, unu cambiu donat s’isperu: Occhioni c’at bene giogadu pro sa prima orta dae incomintzu, lassat logu a Zanchetta. Mancu barant’annos in duos…