Tres puntos de oro, sos chi sos biancos terranoesos nde batint dae s'Umbria. Tres puntellos chi si annanghent a sos tres de sa chida passada in su derby, e si arrivit duncas a ùndighi in chimbe garas, frutu de tres bìnchidas e duas aparinadas.

Totus signales bonos chi Occhiuzzi nde torrat in balija dae Gubbio, e chi nos fàghent nàrrere chentza duda peruna chi sa perdèntzia in su Nespoli cun sa Fermana de s'última die de gennarzu est istada menzus de una bìnchida. Cussu chi pariat su puntu pius bàsciu de s'istajone de seguru at achesu carchi lugore in sa conca de sos giogadores biancos. E dae tando semus avreiguende un átera Olbia.

Lasca abberu sa crònaca de sa gioghera in cue in Gubbio: Occhiuzzi ponet in campu Sposito intra sos palos, defesa cumposta dae Brignani, Belloni e Emerson, mesania cun Travaglini e Arboleda in sos oros, Dessena e Zanchetta a mesu, sas bucas de fogu sunt Ragatzu, Contini e Nanni.

A su minùtile 5 Spina ischìrchinat dae fora, ma Sposito blocat a terra. Pro bìdere una falada perigulosa tocat de aisetare su de 21 minùtile. De sos padronos de domo: dae una bòcia partida dae sa banderedda, Arena ponet in áera dae sa dresta unu bellu tiru traessu, chi Bulevardi intzichit de conca, ma s'isconchinada finit alta de pagu.

Bàtoro bortas de rellozu e congruet sa gara de Travaglini, chi non si reprendet dae una atzumbada cun Spina. Occhiuzzi ponet intro a Sperotto. In su de 28 minùtile bi proat Rosaia dae fora, ma Sposito parat cun pagu anneu. E a duos minùtiles dae sa fine de sa prima fache, bi proat Ragatzu, ma su tiru de Tanieleddu est debile e finit in sas guantes de Di Gennaro.

A sa torrada in campu, s'andamenta de sa gara non cambiat. Ma a su de 57, s'árbitru cuntzedit sa penalidade manna a s'Olbia: dae sa banderedda sa bòcia finit in s'áera eugubina, in ue Arena intrat malamente subra a Brignani. Dae sos ùndighi metros si presentat Ragatzu chi brassamat Di Gennaio. Rete nùmeru battòrdighi pro su cuartesu, e cun custas signamos fora de domo dae ses garas sighidas.

Su Gubbio proat a arrempellare-si a su aju terranoesu: Bontà de conca a su minùtile 63, ma sa mìria est mala. Occhiuzzi tando detzidit duos cambios: intrant La Rosa e Corti pro Zanchetta e Nanni. Semus a su de 66. A su de 74 Toscano proat a aparinare, ma su tiru sou finit largu meda. Tres giros de rellozu e s'Olbia cambiat duos giogadores: essint Dessena e Contini, assazant su campu Incerti e Babbi. A su minùtile 81 Nicolato colpit de conca, ma chentza profetu, e in su tempus de recùperu cumbinat in sos pes de Ragatzu sa bòcia de su 2-0, ma sa girada est fora de mesura.

Finit duncas 0-1 pro s'Olbia chi como devet aprontare cun bonu cuidadu sas garas de fundamentu contra a Imolese e San Donato.

Roberto Mette