S’iscuadra achivit sa rete a incomintzu cun Dessena e pensat chi sa gara tiad podere essere agabbada Ragatzu fuit subra s’ala destra e donat sa bona idea in sa mesania de s’area, Contini paret prontu a isbatzinare ma iscradiat, Dessena si lampat subra sa boccia che unu falchittu e a bolu violat sa rete ‘e Rossi, bardianu istrantzu. Est su minutu undighi e sos contos parent fatos, sos sardos meres de su campu, chircant sa segunda rete sighende sa balia e su talentu mannu de Ragatzu, ma pensant pius a defendere su pretziosu vantagiu, stejende insegus su bilanciamentu de s’iscuadra. Su bentu carrat carchi nue niedda tando, cando s’arbitro frusciat duas bortas, sinnende sa fine de su primu tempus.

In su segundu tempus Annan e D’Auria leant su logu de Agyemang e Corner pro s’Imolese chi torrat in campu cun animu nou, cando Olbia abarrat modde e cun pagas ideas. Sos frutos no istentant a giompere: Sposito bi ponet manos e pes sarvende duas bortas sa porta terranoesa cun duos meraculos, ma a sa terza proa si devet arrendere. Est su minutu 52 e s’imolese cun Faggio apparinat sa gara, 1-1. Su giogu no mudat meda e colados solu otto minutos sos emilianos covecant sa gara.: D’Auria che brincat Bellodi chena penare meda e sinnat sa segunda rete in pagos minutos, Imolese 2, Olbia 1. 

Olbia tando si lassat trampare dae su malu nervosu a s’arbitro puru, ammuntonende papiro giallos a cantu potet, otto sos brigados solu pro sos sardos. Ragatzu, Brignani e Emerson puru, chi diffidados devent bricare sa partida de Martis chi benit. S’attacu finale, tra coro e disisperu, no donant su frutu isperadu a sos biancos lassant tres puntos pretzios a s’imolese chi como potet torrare a isperare. Pro s’Olbia, frimmada sa serie positiva, abbarrant sos dolores de conca.

Mastru Occhiuzzi narat chi su ciaffu reztidu potet tramunare in balia. Martis nos tocat fora ‘e domo còntra San Donato Tavarnelle. 

Mario Bua Capitta