Semper caru m'isteit Recanati...

Semper caru m'isteit Recanati...

S'Olbia in beste de biazu non perdet colpos. Est atesu de su Nespoli chi s'at frabbigadu una salvesa chi solu sa matemàtiga istentat a sentensciare!

Occhiuzzi oramai cambiat pagu in sos ùndighi chi ponet in campu: Sposito bardianu de sos palos, Emerson, Bellodi e Brignani a defesa sua, mesania cun Arboleda a dresta e Sperotto a manca, in mesu Dessena e La Rosa, e sos tres de ofesa Biancu, Ragatzu e Nanni.

Sos ballos los comintzat s'Olbia a su de 7 minùtile: Biancu dae fora, ma sa mìria est alta. Colant deghe minùtiles e Bellodi at duas ocasiones: sa prima est ribàtida dae Fallani, sa segunta ch'est fora. A su de 26 si segat Sposito, daboi de un'abutinada cun Giampaolo: intrat Van der Want. Tres bortadas de rellozu e s'Olbia ballanzat su aju: punitzione de Emerson dae 35 metros, s'andamenta curiosa de sa bòcia ingannat Fallani e finit in su sacu.

S'ischidat sa Recanatese: a su de 42 Sbaffo a colpu seguru, sa bòcia ch'est fora, ma due minùtiles a pustis, Giampaolo deretamente dae sa banderedda che la cravat intro. Sos de domo bi creent e in su recúperu unu bellu tiru a giru de Sbaffo acatat però prontu Van der Want chi cun sa manu ch'altziat sa bòcia e ponet fora.

A su segundu tempus, luego Nanni perigulosu dae s'isvilupu de unu tiru dae sa banderedda. Ma s'isconchinada sua colpit a su batile unu defensore anzenu e sa bòcia che cabulat sa traessale. Sa gara si achendet etzi pro sas ocasiones dae frimmu: a su de 61 est Ferrante pro sos de domo chi dae unu tiru dae su corru, tirat repentinu a bolu dae deghe metros ma ponet fora. Su mantessi destinu pro Morrone unu minùtile a pustis: drestu apenas intradu in áera, ma non incuadrat sa porta.

A su de 66, Senigagliesi tocat cun sa manu in s'àera, s'árbitru cuntzedit sa punitzione manna a s'Olbia e Ragatzu dae sos ùndighi metros non faddit. Semus torra dainnanti. Ma a dolu mannu durat pagu. Passant duos minùtiles e dae unu tiru traessu in áera Sbaffo lassadu solu colpit de conca e aparinat sa gioghera. S'Olbia non b'istat e già a su minùtile 70 Dessena proat a ofendere, ma s'isconchinada sua finit fora serente a su palu. Ma a su de 82 est torra Ragatzu a ammurtijinare sa Recanatese: imbucada de Nanni pro sa buca de fogu cuartesa chi dainnanti a su portieri non faddit.

Non sutzedit pius nudda, su tempus de bìdere in campu Corti e Incerti pro Nanni e Biancu, e su montiju solteri leopardianu devenit pro s'Olbia poesia de salvesa.

Calèschidu Occhiuzzi cun sos giornalistas: "Ischiamus comente fàghere male a sa Recanatese chi beniat dae unu mamentu de bonu saludu. Sos giogadores mi sunt sighende a bruscinu. Meritu finas de sos sustenidores nostros chi nos ant sighidu totu s'istajone e de sa tzitade de Olbia chi nos at trasmissu sensu de apartenentzia".

Roberto Mette

GLOSSARIU

Sentensciare = decretare
Abutinada = scontro
Batile = nuca
Corru = angolo/corner
Serente = radente
Calèschidu = gongolante
A bruscinu = alla perfezione