Olbia perdet 2-0 in terra toscana, ma onorat su campu cun su giogu et balanzàt su derètu a cumpètere in serie C, pro s’ottavu annu unu fatu a s’àteru, prima orta in s’istoria ‘e s’Olbia. 

Pagh’istoria in sa partida: sos sardos sunt sarvos, Lucchese si giogat s’intrada in sos playoff. 

Abbastant 13 minutos a sa Lucchese pro abberrere sa janna de sas garas playoff: Bruzzaniti si giogat s’omine sou in sa mesania de s’area manna, donat una boccia pretziosa a Ravasio, chi no perdonat. Nudda potet Van der Want. 

Sos sardos sighint a ispinghere das sas alas, cun Arboleda a destra e Sperotto a manca, Dessena mantenet bene sa mesania, ma Ragatzu timìdu perigulu numeru unu de sa serie C bidet pagas bocces, solu a chimbe minutos dae sa fine de su primu tempus resessit a nde recuperare una chi pariat perdida e a bolu isbatzinat una de sas suas. Coletta, bardianu ‘e domo b’est e si sarvat in corner comente potet. Gasì isponet s’arbitro su giogu fruscende duas bortas.

In su segundu tempus sas iscuadras gherrant meda in sa mesania, ma sos bardianos godìnt de sa die soliana de s’eranu, fintzas a su minutu 76, cando Ravasio recuperat boccia e dae fora ‘e s’area isbatzinat a cantu potet. Tiru potente e pretzisu e sa porta de Van der Want ruet un’àtera olta.

Occhiuzzi donat tando logu a tota sa panchina sua, ma sos cambios no mudant su destinu. Ragatzu est s’urtimu a s’arrendere e a sue 95 bi torrat a proare: solu duos centimetros partìnt sa boccia isbatzinada dae fora e area, dae sa rete numeru 20.

Paga partida pag’istoria, ma isse sinnat 19 retes e si classificat metzus bomber de su girone, custu lassat una tanca innida pro su tempus bennidore, tra campiones de classe manna e piseddos chi s’esperientzia la sunt cumprende in caminu. S’isterrida b’est.

Mario Bua Capitta, Amistade