OLBIA, MALOS A DOMARE!

OLBIA, MALOS A DOMARE!

Cando amus bidu sos piseddos, meres de un’incominzu lestru, de rara bellesa, ruende suta de una rete, dopo una geniosa punizione de sa Viterbese, istitulada dae Valpolicella, amus pensadu de timire, ma no fit beru.

Rutos a murr’a terra, nos fimus potidos istropiare e pèrdere curagiu, ma tando pro su misteriu de sa maghia, su coro at binchidu su disisperu, e mancari sa Viterbese mustraiat fortza e faghiat bona gardia in sa mesania de su campu, tando amus bidu solu unu colore, su biancu olbiesu, fintzas a su paregiu. Lella at fatu sa proa de conca a su minutu 12, Brignani at leadu su palu in pienu, semper de conca, pustis de 5 minutos. Emerson, a su minutu 19, at fatu bidere a totus comente si tirat unu corner, cando sa bocia at fatu su bentu a sa porta. Ma est tocadu isetare su de 38 pro tènnere su frutu de tantu tribagliu. Passada sa mesania de pagu, Chierico at furadu bocia a s’aversariu, bolende est fuidu a s’ala manca e cun cross bellu misuradu, at piscadu sa balia de su leone. Udoh, cun sa lestresa de su leone, antecipados totus, de petorra che l’at imbolada a intro, liberende donzi orriolu.

Unu a unu isponet su primu tempus, giogu e coro lassant bon’isperu a su segundu tempus...

E s’isperu no fit in debbadas, s’Olbia tucat cun balia manna. Udoh non est de parare, cun una finta felina lassat s’omine sou abucallotadu, passat sa bocia a Chierico, chi ponet in giogu Travaglini, chi torrat a crossare a mesu de aera. Udoh non podet faddire, cun una passada e resorza destra, no lassat iscampu a Daga, portieri sardu de sa Viterbese. Udoh oe non si potet parare, furat su tempus a s’omine sou e torrat lestru a tucare. Martinelli àteru no potet faghere chi l’imbolare a terra. Ultimu omine e ruju deretu, sa Viterbese abbarrat in deghe. S’Olbia, faddidas unu paju de retes, un’ocasione manna cun Biancu, comintzat a mustrare sinnos de istrachidudine. E sa Viterbese non drommit pro nudda.

A su faghe-faghe creschet s’impignu de sos latziales, chi puru in deghe, a su minutu 70 torrant a prendere s’Olbia, cun isconchinada de D’Ambrosio, lassadu solu in mesu a s’area. S’Olbia però non si rassignat, b’intrant in campu fortzas noas, e propiu Occhioni, piseddu de Logusantu, bintradu dae pagu, ponet in crisi sa defesa istranza cun sa lestresa sua: passat bocia a Arboleda, chi bidet in mesu de area Biancu a sa sola. Biancu si liberat bene e no lassat iscampu a su portieri, a su minutu 85.

Finit tres a duos. Sos ultras torrant a cantare e Olbia si gighet a domo tres puntos, pretziosos che gemmas de oro.

Mario Bua, Amistade