Olbia tra bona e mala sorte

Olbia tra bona e mala sorte

Sos filosofos de sa Grecia antiga la giamaiant Tyche e la connoschiant bene. Sos mannos de Roma la battijenit Fortuna. Pustis sa sorte, tra mitologia e folklore, est torrada a sa tzente, a su populu e a su giogu pius amadu, sa fubba. Potimus narrere chi sa sorte est democratica e tando Olbia, de seguru no est in depidu…lu narat sa partida de Lucca.

Sa lucchese tuccat timorosa, iscaddada sae sa rutta mala de sa dominiga prima in sae Chiavari, contr’a un’Olbia mere de unu giogu e de un’identidade chi non s’idiat dae tempus meda, fora ‘e domo como si giocat che in domo matessi.

Su primu tiru in porta est sue Bellich de sa Lucchese, chi de conca non inquadra sa porta. Ma sos piseddos non timent pius a niune e sighint a currere e giogare sa bocia coment’ischint issos, fuint a s’ala destra cun Udoh, Lella, Arboleda passat a Biancu, chi allumat sa partida, cund’una maghia improvisa. Su portiere luchesu non potes nudda pius che s’abbaidare sa bocia intro su saccu.

Sa Lucchese non est cuncorda e proat a paregiare su contu cun Nicola Nanni, chi si liberat bene meda in sa mesania de s’aria e girat in porta una fusilada, mirada suta sa traversa. Ma Ciocci b’est, sa parada sua manna, narat totu de su talentu, de custu giovanu bennidu dae Casteddu. Su primu tempus sighit a currere tra desitzu e timore de sa Lucchese e su coraggiu de s’Olbia, chi mantenet segura sa briglia de su giogu. Cando s’arbitro frusciat sa fine de su primu tempus si cumprendet luego, chi su segundu non at a essere fatzile pro nudda.

Cumprendimus luego chi sa Lucchese non cheret perdere ca torrant in campu indemoniados, ma s’Olbia no tremat e tando si faghet a bidere sa sorte. Duas bortas Ragatzu in sos primos minutos de su segundu tempus, si procurat s’occasione pro tancare sa partida e semper pro unu nudda, sa bocia si perdet foras dae sa porta. Ma est Semprini, lassadu liberu de tirare, ch’agat sa gemma de oro de sa dominiga, cund’una bocia a girare, subra in s’incrociu. Nudda potet faghere Ciocci. Unu a unu.

Ma sos piseddos no s’assuconant. Giandonato a su minutu 74 isbatulat dae fora ‘e area unu tiru chi su portiere non potet mantenere in presa, King Udoh a porta boida tirat a sas isteddas. Fit puru in fuorigioco. Giandonato s’attopat tirende e che devet bessire. Bintrat Occhioni, giovanu de Logusantu. S’atzione in fatu partit Visconti in contropiede, passat a Nanni chi no lassat iscampu a Ciocci. Sa sorte no si cuat pius…oe, nos est contraria.

Pro s’Olbia bintrant Demarcus e Mancini, lassant su logu Biancu e Chierico a su minutu 79. S’Olbia no cheret perdere. A su minutu 80, Ragatzu tirat in s’area una punizione, abbojat de conca Demarcus, su portiere bessit a boidu e Udoh solu in sa linea de sa porta non recessit a che l’ispinghere a intro, non si cumprendent comente. Forsis sa sorte a sa cua, b’at postu s’anca in mesu…

A su minutu 86, Nanni puru, solu innanti a sa porta, si mandighat su tres a unu. Ma est semper Olbia chi potet giompere a su meritadu pareggiu.  Cando sa lucchese pensat solu a perdere tempus, fuit Occhioni a manca, crossat bene meda a mesu aria e Udoh in pienu tempu de recuperu s’agat in peses sa bocia pro su pareggiu, a duos metros dae sa porta, ma tra isse e sa porta b’at semper chentu ancas, visibiles e invisibiles…

Olbia potet e devet metzorare, namus puru che sa sorte at unu depidu cun sos piseddos nostros.