Chirchede sabiesa...

Chirchede sabiesa...

Sa Reggiana, comente sa classifica narat, est forsis s’iscuadra pius forte chi s’Olbia at abbojadu, fintzas a como. E puru sos piseddos olbiesos no pariant pro nudda timorados dae sa fortza de Cigarini e cumpantzos. S’ischire tecnicu, taticu e atleticu de sos gadduresos, man a manu chi su tempus passaidas, ch’est pigadu a pizu cund’unu giogu biu e balente, chi at comintzadu a oriolare sos regianos. 

Sos omines de sa Regia ant cumpresu luego chi deviant atacare pro binchere, ma difendere puru, contr’a un Olbia chi cun Ragatzu a un’ala e King Udoh a s’atera, los ant fatos timire.

E sa prima giogada manna est propriu sa nostra a su vintiduesimu minutu:  frimmadu male King Udoh, punizione dae sos 30 metros, fintat Emerson dae manca, ma crossat de destru…Che pigat a chelu Brignani…s’isconchinada sua che paret intro, ma su portiere faghet su miraculu, chentza resessire a frimmare sa bocia, chi li fuit de manos, su cumpantzu in difesa salvat in corner.

Ammunidu Brignani, su segundu dopo Lella, sa Regia proat a che creschere sa pressione pro s’acurtziare a sa porta de Ciocci, cun Rossi si faddit dae fora ‘e s’area, a sue 29 ma est semper s’Olbia chi in contropiede, cun ordine e calmesa, faghet a timire e Lella in rovesciada agiummai los trampat, a su minutu 30 de su primu tempus. Eric Lanini faghet sas proas semper a sue 35, ma s’istutulada sua ch’est atesu dae sa porta. Travaglini leat su logu a Pinna atopadu, chi bene fit ispinghende in s’ala sua. Primu cambiu obligadu a su minutu 36.

Dae tando su giogu curret semper de pius acurtzu a s’area olbiesa, cun pagos perigulos pro Ciocci, Udoh benit presu in area, forsis est rigore a sue 43, in fau falat Zamparo a s’ater’ala eimpignat su bardianu de sa porta olbiesa i s’unica parada difitzile de su primu tempus. Isponet gasì sa prima parte, zero a zero.

Su segundu tempus bintrat Biancu, abbarrat in s’ispogliatou Giandonato. E s’Olbia sighit a faeddare una limba connota: no est bennida a sa domo reggia pro difendere una partida perdida, sos piseddos si la cherent giogare comente semper e no timent sa forza de sos primos.

Biancu, su tamburinu sardu de su 2000, faghet bidere it’est sa balia, furat sa bicia in sa mesania, attacat su logu e dae trinta metros istitulat. Est su minutu 55 e sa bocia ch’essit de pagu. A su minutu 62 bi torrat a proare, semper isse Biancu, s’isbatulada curret acurtzu a su palu.

Sa Reggiana paret atambainada dae su coragiu de sos biancos, ma no drommint e torrat pianu pianu a leare sa briglia de su giogu. Ma sos assuconos pro Olbia sunt semper pagos, Samuele Neglia a su minutu 68, da manca colpit sa rete esterna. Lanini torrat a fagher sas proas a su minutu 70, cun d’una bomba dae fora ‘e area, Ciocci si salvat in corner.

Sa partida bella e gerrada a sae paris, ma cun pagas emotzione s’acurtziada a su minutu 80. Bintrat La Rosa in logu de Lella in s’Olbia e Diana ponet Sorrentino pro Zamparo in sa Reggiana e carchi cosa mudat. Sa regia at 22 titolares e s’idet bene. Sorrentino fuit a muida e ponet problemas nosos a s’Olbia chi perdet bocia in mesania, Neglia la faghet sua, bidet unu bucu in sa difesa bianca, in verticale lanciat a Lanini chi lestru fuit e no perdonat, a 5 minutos dae sa fine. S’Olbia perdet coraggiu e sa forza de sa Regia pigat a pizu. Lanini torrat a furaret bocia in mesania, a fuire e su tiru forte che ferula no lassat iscampu a Ciocci.

E sos tifosos de sa Reggiana, accudidos in meda, cantant a boghe manna fintzas a su frusciu finale de s’arbitro. Un’atera partida, perdida contra a sos primos e cussu fit in preventivu, ma sa manera faghet pensare,  s’animu e sa conca potent e devent metzorare, ca sa partida de oe narat chi sos piseddos si la potent giogare cun totus, semper a conca alta. Canzi cuncordat.