A deghe s’istat bene!

Una serentina de istadiale donat sa de tres bìnchida a sos biancos. Chi Canzi, contr’a su Gubbio, ponet in campu cun sa mantessi defesa de sémpere: Ciocci portieri, e sa linea frommada dae Arboleda, Brignani, Emerson e Travaglini. Segunda linea cun Chierico mesu mànchinu, Lella mesu drestu, e in mesu a issos Palesi. Daboi, Ragatzu trescuarteri a susténiu a sas duas puntas Udoh e Mancini.

Atacat a tumbarinu s’Olbia: a su de duos minùtile, Ragatzu dae manca leat sa traessa e in mesa girada intzichit su portieri, totu in paga iscuta. Respondent sos umbros cun una ischirchinada chi isciunghet alta a su de 8, e duos giros de rellozu a pustis, chin una bella parada de Ciocci, chi s’istropiat, ma si nde pesat luego.

A su de 15, Ragatzu dae dresta tirat a colpu seguru, sa bocia iscudet a terra e bessit alta. Sa gioghera sighit cun culpu-e-resposta fitianos: conca de Serao alta a su de 16, e daboi sùbbidu tiru de Ragatzu chi intzichit su portieri. A su de 20 tiru longhinu de Emerson e colpu de conca de Brignani, chi passat a pagu tretu dae su palu.

Su de 29: su giogu printzìpiat dae una punitzione de Emerson, che la congruet Udoh, chi guasi dae sa linea de fine-campu che l’addobbat a fora, a filu de su palu. Minùtile 32, Palesi bessit de campione dae s’áera bianca, cambiat giogu cun unu tiru traessale chi Ragatzu frimmat a sa manera sua, ma benit aterradu. Punitzione de s’atacante campidanesu, bocia in àera chi Lella, a palas a sa porta, cun una tòrchida de conca, ponet in su sacu. Semus a su de 33. 

Leat in manu sa partida s’iscuadra umbra, chi si faghet perigulosa intra su de 35 e su de 39 cun tres faladas infadosas pro s’Olbia. Chi si torrat a bidere a su de 45 cun unu tiru dae fora de Ragatzu, chi Ghidotti frimmat cun pagu anneu. Duos minùtiles de tempus annantu e finit sa prima fache.

A sa torrada dae su recreu, su giogu si apàulat in sa mesania, cun pagas ocasiones de rete. Sa prima insonada est de su Gubbio, a su de 55, cun Francofonte chi addobbat altu dae fora de s’áera. S’Olbia non est pius padrona de sa mesania, su Gubbio creschet, ma pro fortuna chena pùnghere pius de tantu. Chierico si acatat bene comente mesanu basciu e si mustrat a sos tifosos chin duos lancios a sa Pirlo, chi pro paga mesura non liberant sos atacantes olbiesos a dainnanti de Ghidotti.

A su minùtile 63, una de sas pagas afundadas a dresta de Arboleda, chi dae fine-campu ponet in mesu àera, in ue Ragatzu perdet s’ocasione de tirare a porta. A su de 65, Canzi bogat Mancini e che mintet La Rosa, chi si ponet innanti a sa defesa, Palesi alziat trescuarteri e Chierico pigat su postu sou. Ragatzu si annanghet a Udoh in atacu. A su de 68 Sainz Mama tirat altu dae punitzione.

A su minutile 74, Aurelio dae fora de àera ischìrchinat altu, unu minùtile a pustis Oukhadda tirat dae dresta a giru. Bocia velenosa chi bessit de pagu in su palu de manca. Sos perìgulos pro sos biancos benint totus dae dresta: a su de 79 Ciocci parat bene ma ponet a fundu-campu. Su Gubbio punghet pagu ma est creschende, Canzi su nd’abbidet e faghet unu colpu e tres cantos: a intro Giandonato, Demarcus e Occhioni, nde istupant Palesi, Chierico e Udoh. 

S’Olbia at como su giòvanu patadesu in atacu a fàghere cumpanzia a Ragatzu, sa mesania torrat in linea cun Occhioni, Giandonato, La Rosa e Lella, dae manca a dresta. Sas iscuadras si islongant meda in su campu, e sas faladas creschent, ma guasi sèmpere chin pagos anneos. A s’ultimu minùtile bessit Ragatzu, istruncadu, e intrat Boccia. Chimbe minùtiles de recùperu chin paga cosa e s’árbitru frùsciat tres bortas.

S’Olbia agantzat su Gubbio – a sa prima arressada de s’istajone – e si setzit a deghe puntos. E pro sa prima borta muntenet neta sa porta sua! 

Roberto Mette, Amistade