Annu nou, ispera noa!

Comintzat bene su 2023 pro sos òmines de Occhiuzzi, chi daboi de bàtoro meses torrant a bìnchere in su Nespoli. Sos biancos falant a campu cun Sposito tra sos palos, linea de defesa a tres frommada dae Travaglini, Emerson e Brignani, mesania cun Fabbri in s’oru drestu e Sperotto in cussu mànchinu, Biancu e La Rosa in mesu, trìbide in atacu cun Ragatzu, Nanni e Contini.

Sùbbidu su Montevarchi perigulosu a su de 10 minùtile: Jallow tirat a porta ma Sposito printzìpiat bene sa prima sua gara cun sa casaca terranoesa. Ses minùtiles a pustis e Marcucci batit dae su corrigheddu e intzichit sa traessa. Respondet pro s’Olbia Emerson dae punitzione a su de 19, ma su portieri toscanu parat.

Semus a su de 25 cando su Montevarchi colat: ribàtida tosta pro Emerson, istrobbadu dae su bentu, e sa bòcia arrivit a Lisci chi bràssamat Sposito. Sos biancos proant a pùnghere cun Emerson semper dae bòcia frimma, ma sa punitzione sua congruet a fora. Semus a sa mes’ora giusta! Oto giros de rellozu e bi proat Brignani de conca, ma sa mìria est faddida.

Ma a su minùtile 40 Contini aparinat sa gioghera: Nanni ponet in mesu de àera pro sa conca de su giòvanu atacante biancu chi in bolu de conca non lassat iscàmpiu a Mazzini. Non sutzedit pius nudda finas a sos duos frùscios de s’àrbitru.

A sa torrada a campu, sos òmines de Occhiuzzi parent pius briosos e a su de 54 addòpiant. Dae unu tiru dae sa banderedda, Ragatzu faghet una mofitia chi che imbàddinat sa defesa toscana, e s’agatat duncas solu in sa de manca, leat sa mìria in mesu a milli ancas e ùnfiat sa retza. Chimbe bortas de fritzitas a pustis e bi proat Nanni a marcare a sa festa: tiru tropu in mesu e Mazzini parat.

Occhiuzzi como si carrarzat: a su minùtile 66 giamat a fora Contini, e che mintet Incerti, pro garentire unu sedatu pius bonu in mesania. Su Montevarchi apretat sos biancos in su mesu-campu insoro ma est semper s’Olbia sa pius perigulosa: a su de 74, torra Brignani de conca ma chena profetu! A su de 81 Occhioni dat su cambiu a Biancu, e chimbe minùtiles a pustis Babbi intrat a su postu de Nanni, ma non cumbinat pius nudda e sos biancos de Caddura assazant daboi de meda tempus su sabore durche de una bìnchida in domo insoro!

Cun sos giornalistas Occhiuzzi si mustrat cuntentu ma chena dare pagu ispazu a mannas cuntentesas: “Bene sos tres puntos, ma ancora non amus nudda de festare, àntzias, devimus meledare subra sas faddidas fatas. S’iscuadra como mustrat una frimmesa tàtica mazore, amus fatu bene su fora-giogu e duncas sa linea de defesa podet como istare pius alta, ma semus semper in perìgulu, e como andamus a Pesaro chi nd’at fatu tres a su Fiorenzuola in domo insoro. Pagu tempus a sas festas duncas e pensamus a mezorare”.