Archibusada a s’apparinada!

S’ammentu de Sinisa Mihajlovic, omine de caràttere forte de sa fubbal, accurtziat totu sas animas de s’isport e lassat logu a una die noa, de isperu mannu pro sos sardos oriolados dae sa classifica, pius che dae su giogu ‘e sa Lucchese, ch’abbaidat a subra, verso s’arcu pius altu de su chelu de sa serie C.

Sa prima boccia minetat sa porta olbiesa e annuntziat sa tempesta: Tiritiello lassadu a sa solu in sa mesania de s’area, coglit su cross lamapadu dae sa bandela e cun sa conca carignat sa linna de su palu difesu dae Van der Want. Est su minutu 13. Olbia no tremat però e torrat a sa contra s’oriolu cun interessu ‘onu: Contini domat cun maestria manna una boccia chi jumpat su campu intreu pro baranta metros, donada dae sa defesa ‘e domo, si buffat sa defesa lucchesa e si presentat a sa sola innanti a Cucchietti, bardianu istrantzu chi sarvat sa porta sua cun sa forza de su disisperu. Ite dòlu aiat potidu mudare s’istoria de sa partida, ma su destinu at nadu nono.

Rete faddida rete retzida, sa fubbal at unu codice nodidu. Su film torrat insegus a su minutu 13. Su matessi corner, s’omine de sa contra toscana accudit dae attesu, comente proadu meda bortas,  si narat Ettore Quirini e custa orta sa conca sua no faddit. Vand Der Want, cuadu dae totu sos omines ammuntonados in s’area sua, bidet sa boccia solu intro su saccu.

Unu minutu infatu, Van Der Want impedit a sa Lucchese de tancare sa partida e sarvat s’Olbia cun sa manu manna sua, cando Buzzaniti, bene imbucadu dae sa mesania sua si li presentat a sola innanti. Tando s’iscuadra terranoesa agat s’orgoliu perdidu e s’ischidat. Brignani dae 40 metros chircat s’eurogoal, mantenet bascia sa boccia e s’ibatzinada forte e pretzisa, narat cantu diciosu est su bardianu istrantzu. A su minutu 45 Biancu dae sa bandela crossat comente solu isse ischit faghere, Ragatzu a bolu accoglit in s’atter’oru ‘e s’area e isbatzinat a cantu potet. Sa boccia carignat sa traversa e su bardianu mancu la ‘idet.

In su segundu tempus sa Lucchese paret no apat problemas in su controllu de su giogu de sos sardos e semper pronta a agabbare su contu, tando Olbia agatat su coro, si narat La Rosa, naschidu e paschidu in Terranoa e oe metzus omine in campu. Semper Biancu dae sa bandela crossat una boccia garriga ‘e velenu in sa mesania de s’area istrantza, sa defesa no resessit a liberare comente si devet e La Rosa acucadu in area ponet potentzia e pretzisione in su pè destru sou. S’unu a unu abberit a s’isperu de una partida noa: sos toscanos sighint a chircare sa binchida, mustrende nodidu su meritu de sa classifica issoro e Olbia bi torrat a crere puru. Babbi de conca a su minutu 92 e Biancu a a sue 96 s’accutziant meda abberu a sa rete, ma no b’at piu tempus, sa Lucchese s’accuntentat e defendet. Como toccat de pensare a un’àttera partida.

GLOSSARIU

Ammentu: ricordo

Jumpare: attraversare

Dòlu: dolore, inganno

Faddire: fallire

Naschidu e paschidu: nato e cresciuto

Isperu: speranza