Binchidos ma no cumbinchidos

Die assoliada in Pescara, in s’última gioghera de su mese de santaini. S’Olbia falat in campu cun Ciocci portieri, sa defesa in linea cun – dae manca a dresta – Travaglini, Emerson, Brignani e Pisano, mesanu bàsciu Giandonato, unu passu innanti Lella a dresta e Palesi a manca, Biancu a susténiu de sas puntas Ragatzu e Mancini.

Comintzat forte su Delfinu, cun Galano chi paret in die bona: a su de 7 minùtile tirat dae fora, ma sa bocia non bidet sa porta e a su de 9 parat Ciocci unu tiru chena mannas pretesas. Ma unu minùtile a pustis, est bravu su portieri nostru chi salvat su resultadu parende si tiru a colpu seguru de su atacante abrutzesu, lassadu liberu in mesu de áera.

S’Olbia paret intumbida dae custa parténtzia possente de su Pescara, e sufrit sa marròcula Galano, chi movende-si de continu, sos biancos non resessint a trofizare. Ma a bellu a bellu s’iscuadra de Canzi ballanzat su pussessu de sa bocia, e leat sas giustas mesuras a su Delfinu. 

Pro seriare una falada perigulosa depimus però aisetare a su de 26, cun Mancini chi blocat bene unu tiru tzentrale dae mesania, donat sa bocia a Ragatzu chi faddit sa rete dae acurtzu. Ma fit totu debbadas ca s’atacante nostru ex pescaresu che fit fora-giogu.

S’Olbia mancari cun paga fortza si faghet a bídere in atacu, e sas faladas sunt guasi semper dae dresta, in ue Lella mancari a tardu intrat in gara. Ma a su de 30 minùtile, tiru dae sa banderedda de Pompetti, dae sa dresta de sos abrutzesos, conca de Ferrari in s’áera bianca, pro fortuna deretamente in sas guantes de Ciocci.

A su de 33 minùtile, punitzione dae dresta pro fallu subra a Lella. Batit Giandonato in áera, sa defesa pescaresa ponet fora de campu. Dae sa banderedda semper su mesanu ex juventinu, bocia in mesu, intzichit Emerson chi leat sa traessa. Sa bocia torrat a s’Olbia, a Mancini chi subischet unu fallu. Giandonato ponet in áera ma parat Di Gennaro chin paga fadiga. 

Minùtile 40, bella falada de s’Olbia dae manca, Travaglini ponet unu tiru traessu in áera, Giandonato miriat bene ma sa bocia congruet alta. Repartentzia lestra de su Pescara, sa palla arrivit in áera a De Marco chi blocat cumpridu, brincat Ciocci ma non resessit a pònnere in rete pro s’istrobbu de Pisanu.  Si andat a su reposu, daboi de unu minùtile de tempus annantu. 

Si torrat in campu cun sos mantessi ómines. Su Pescara partit cunvintu. E resessit puru a andare in gol, cun una mala girada de su nostru Pisano, chi intrat in sa porta de Ciocci. Ma su defensore biancu at subìschidu fallu e s’arbitru che bogat su gol a sos abrutzesos. A dolu mannu, Pisanu est custretu a bessire e Canzi mintet a Simone Pinna. 

Su Delfinu ispinghet meda ma non est mai perigulosu, cun Ciocci arressu pro tempus longu. Una fiamada in su de 66, de Ferrari chi in s’áera benit acatadu dae unu tiru longhinu e unfiat in rete, ma est fora-giogu.

A su 69, Canzi ponet Demarcus pro Mancini in atacu, Chierico pro Biancu. Ma non est una mofitia bona s’essida de su trescuarteri tataresu, ca s’Olbia in daennanti si che drommit.

Unu giru de relozu e Zappella ponet in áera dae dresta, Ferrari intzichit bene ma sa bocia essit pilu-pilu, chin Ciocci bàtidu.

A su minùtile 74, dae unu tiru dae sa banderedda, Ferrari girat de conca pro Rauti chi colpit débile, Ciocci parat chentza anneu. Si bidet s’Olbia, in bonora: ischirchinada de Giandonato in áera, la curret Demarcus chi s’abbutinat cun De Gennaro. Su portieri pescaresu devet lassare su postu a Sorrentino. S’Olbia finit inoghe.

A su de 83, punitzione dae manca, pro fallu subìschidu dae s’indimoniadu Ferrari. Zappella ponet in mesu e Lella imbolat fora. Dae sa banderedda, Pompetti faghet girare bene sa bocia, chi arrivit a unu nudda dae sa linea de porta, dae in ue Drudi ponet in su sacu. Est su de 84 minùtile!

S’Olbia proat a s’arrempellare, ma atacat isconfusionada. S’arbitru reconnoschet 6 minùtiles de recuperu, Canzi faghet a tempus a che mintere in campu Occhioni e Belloni, pro Giandonato e Palesi. 

Unu tiru longhinu in áera abrutzesa benit colpidu de conca dae Brignani chi ponet altu. E a unu minutile dae sos tres frúscios, est su Pescara chi andat acurtzu a addopiare: cun sos biancos totus in dainnanti, in contra-giogu Rauti colpit seguru dae sa dresta, ma Ciocci li negat sa festa.

Finit duncas cun dispiaghere una gioghera chi s’Olbia ch’at frundidu a ultimera. 

Roberto Mette, Amistade

Condividi l'articolo

Scopri il nostro shop

Mostra il tuo orgoglio per i nostri giocatori e renditi protagonista del gioco.

Ultime notizie

comunicato

L’Olbia Calcio è lieta di annunciare il consolidamento della partnership con Geasar,

comunicato

La società rende noto che Gianluca Contini e Alessandro Corti terminano la

comunicato

L’Olbia Calcio è lieta di annunciare l’acquisizione dei diritti alle prestazioni sportive

comunicato

L’Olbia Calcio è lieta di annunciare il consolidamento della partnership con Geasar,

comunicato

La società rende noto che Gianluca Contini e Alessandro Corti terminano la

comunicato

L’Olbia Calcio è lieta di annunciare l’acquisizione dei diritti alle prestazioni sportive

Scopri il nostro shop

Mostra il tuo orgoglio per i nostri giocatori e renditi protagonista del gioco.