Cando bènit su ‘entu, s’Olbia ischit bentulare

Niùnu cheret s’apparinada, sa partida de oe est una finale, una de sas battor chi mancant, pro narrere chie abbarrat professionista e chie invece si la devet giogare a sos playout.

Sa gara tuccat cun carchi minutu de retardu, b’at de acontzare sa rete a palas de sa Curva Mare, pustis amus a cumprendere pruite. Incomintzat s’Alessandria a la minetare, cussa porta chi paret s’aiudu ‘e su ‘entu: giogada galana de su 9 piemontesu Sylla chi faghet tremare sa linna de su palu destru de Sposito. Corti proat a torrare su colpu deghe minutos infatu, proat duas bortas, semper de conca. Indebadas, sa segunda ‘ia sa boccia abbojat su palu puru. Ambas iscuadras proant a fuire innanti, ma sas defesas sunt bardianas de su campu e niune resessit a iscaldire su coro de sa tzente. Gasì isponet su primu tempus, cun duos minutos de recuperu.

In su segundu creschet su bentu fritu, paris cun su timore de perdere una partida de importu tropu mannu e carcunu in tribuna pindaciat un’apparinada desolada, cando su geniu de su mastru allumat su chelu garrigu de nues: Ragatzu trampat s’omine sou finghende de fuire a manca, rupit s’area dae s’ala destra e donat sa boccia a Dessena, chi luego cumprendet chi cussu est cross de serie A e tando isse no potet traire. S’iconchinada no perdonat Liverani, su bardianu istrantzu chi nudda potet. Est su minutu 68 e s’aidu ‘e su bentu benit a sa fine violadu e sa gara abberta a unu giogu liberadu. 

Che colant solu 7 minutos e sos sardos doppiant su contu. Su cumbidu benit dae un’àteru mannu, no solu de edade, Emerson chi dae sa bandela e destra donat una boccia galana, giompet a sa mesania de s’area, inue si faghet àgatare prontu semper isse, semper Dessena, chi chena timore ne irgontza, isbatzinat a bolu. Sa boccia s’idet solu a su balla, balla unfiende sa rete acontza. 

Sa gara paret isposta, ma sas iscuadras no sunt cuncordas. Alessandria chircat sa rete pro la torrare a aberrere cun sa fortza de su disisperu e pro Olbia s’abberit invece su logu pro giogare a fubbal. E gasì pigat a pizu s’arte de chie su giogu lu connoschet: Arboleda e Ragatzu s’àgatant a memoria intro s’area istrantza, dopiu scambiu, boccia domada dae Ragatzu matessi e pasada intro sa rete. Est su minutu 90 ma s’emotzione abbarrat. Ancora Ragatzu tuccat dae manca custa orta e ponnet in sa mesania de s’area un’àteru colpu ‘e geniu. La Rosa si lampat cun sa balia connotta e su bardianu lu prendet a s’anca: rigore. Ragatzu cheret tirare e lu faghet: bardianu a un’ala, boccia a s’atera: Olbia-Alessandria 4-0.

Festa manna e Occhiuzzi custa olta no resessit a domare sa cuntentesa.

Mario Bua Capitta

Condividi l'articolo

Scopri il nostro shop

Mostra il tuo orgoglio per i nostri giocatori e renditi protagonista del gioco.

Ultime notizie

comunicato

La società Olbia  Calcio comunica “di aver sollevato il Sig. Marco Gaburro dall’incarico

comunicato

L’Olbia Calcio è lieta di annunciare il consolidamento della partnership con Geasar,

comunicato

La società Olbia  Calcio comunica “di aver sollevato il Sig. Marco Gaburro dall’incarico

comunicato

L’Olbia Calcio è lieta di annunciare il consolidamento della partnership con Geasar,

Scopri il nostro shop

Mostra il tuo orgoglio per i nostri giocatori e renditi protagonista del gioco.