Cesena in pigada pro Olbia

Cando pustis de unu minutu rues a murru a terra, suta de una rete, in domo de sos romagnolos, tando pro sos sardos, nados pro si sarvare, no potet essere fatzile a si torrare a pesare a sa ritza, ma Olbia no tremat mai.

Colada s’isetada tempesta de s’incomintzu, sos piseddos agatant in sa mesania sas tramas connottas ,pro pintare sa partida bisada dae meda tempus. Ma cando sa traversa parat su tiru a girare de Ragatzu, chi su bardianu ‘e domo Nardi, bonu cantu si siet, mai aiat potidu tennere, tando paret nodidu chi su coro, pari cun s’ischire e sa sabiesa de su giogu ‘e s’Olbia, non potent bastare si mancat sa sorte, ca semus in domo de un’iscuadra chi si narat Cesena, un’iscuadra chi tenet in panchina tzente comente Brambilla, Berti e Missiroli. Duos minutos in fatu, Ciocci bardianu nostru, faghet su miraculu e parat s’isbatzinada, chi pariat intro su saccu de Caturano, ma no prendet sa boccia. Pierini, chi aiat postu su sinnu in sa prima rete, est incue, est solu e no potet faddire. Semus in su minutu 32 e sa pigada si faghet mala. Dae incue a pagu ruet male Pisano, chi devet lassare su logu sou a s’ex Giandonato.

Su primu tempus tancat cun su palu de Ilari, annuntziende su tema de su segundu: niune mai potet narrere chi Olbia est domada o binchida, prima da su frusciu finale de s’arbitro. Atacare un’iscuadra comente su Cesena in domo sua, cheret narrere aberrere sa janna a su contropiede issoro. E cando s’Olbia torrat a leare su cumandu de sa mesania, cun Udoh e Ragatzu in die manna, tantu chi faghent a timire sa defesa cesenate, tando ossopruit sae tres. A su minutu 79, Calderoni crossat dae manca una boccia galana, chi Caturano lassadu solu, devet solu pasare in rete. Udoh c’at retzidu carchis, pagu tempus prima de lassare logu a Saira, si lamentat forsis a rejone. “Pensa a giogare”, l’abboghinat mastru Canzi. Cust’est s’idea de s’Olbia, chi puru perdende 3-0, potet lassare su campu a conca alta e pensare cun animu ‘onu a sa partida de intro ‘e chida cun s’Ancona.

Mario Bua, Amistade