Cesena no perdonat perùna faddina

Sos sardos chircant sos puntos bonos a abbarrare in sun mundu professionisticu, sa contra romagnola abbaidat cun interessu sa serie B. Sos primos de su girone sunt a ses puntos, s’isperu abbarrat, ma oe totu ischint chi no at a essere fatzile pro niune e gasì est.

Adamo bi proat luego a sa tuccada cud’una giogada, bene isterrida dae Albertini e Brambilla. S’isconchinada sua dae duos passos si perdet però in s’aera. Est solu s’undighesimu minutu. S’Olbia no tremat e proat a torrare su colpu: deghe minutos infatu Ragatzu domat una boccia pagu maseda, la donat pretziosa in mesu ‘e area piena ‘e tzente de ambas iscuadras, totu l’abbaidant niune la toccat e su cumbidu si perdet in debadas.

Chimbe minutos infatu La Rosa ruet male e devet lassare su logu a Contini, Biancu faghet unu passu insegus in campu, ca Olbia no potet perdere su bilanciamentu, ma su sinnu est nodidu, s’Olbia no est accudida a Cesena pro pareggiare. E Corti, servidu in sa mesania de s’area dae un’invidu de Biancu, solu de conca, no resessit a faghes frutare su donu mannu: potiat essere istadu su vantagiu terranoesu. Sa balia romagnola torrat a cumandare su giogu, bi proat Corazza impitende sa “Manu e Deus”, benit ammunidu e pustis Saber dae duos passos no agatat sa porta. Gasì isponet su primu tempus.

In su segundu tempus sos cesenates creschent sa forzta e sa pressione, donant s’impressu de podere rupire sa linea bianca, donzi mamentu. Prima Corazza bi proat dae duos passos, chena resessire a ch’ispinghere sa boccia intro sa porta, pustis est sa linna de su palu a salvare Sposito, bardianu olbiesu, ma sa rete est in s’aera e sa defesa sarda, bell’abista fintzas a tando, si perdet: Bellodi lassat passare una boccia innotzente, forsis cumbichidu chi Emerson fit pius prontu a liberare, lestru che lèpere Chiarello si lampat anticipende su bardianu Sposito chi nudda potet e curret che maccu suta sa Curva Mare, chi no est sa nostra…

Olbia no disisperat e bi sighit a proare: Ragatzu a su minutu 95 isbatzinat dae fora ‘e area, pagu distante dae sa bandela, unu missile deretu in porta, cun s’isperu chi su bardianu ‘e domo potat perdere sa presa, ma Suozo no faddit, parat e ponet sos tres puntos in sa casciaforte.

Sos sardos perdent sa partida e gasì ruet sa serie positiva, como isetamus Alessandria in su Bruno Nespoli.

Mario Bua Capitta