Dominiga rànchida

Cun una calda serentina de santaine si presentat su Nespoli daboi de s’imbriaghera bella de Coppa Italia de mèrcuris passadu. Occhiuzzi proat su 4-3-1-2 pro frimmare unu Fiorenzuola lanciadu forte. Dainnanti a Gelmi, defesa cun Travaglini a manca, Gabrielli a dresta, in mesu Emerson e Brignani. Mesania cun Biancu a mesu-mánchinu, Zanchetta mesu-drestu e intra issos La Rosa. Atacu cun Ragatzu a susténnere Sueva e Contini.

S’Olbia partit bene, duos giros de rellozu e Ragatzu de punitzione dae manca impignat su portieri furisteri chi ponet a fundu-campu. Dae sa banderedda ruet unu tiru traessu in áera chi Brignani colpit de conca. Ma Battaiola torrat a pónnere fora. Sos istranzos si ischidant a su de 9 minùtile: Punitzione de Quaini, sos biancos inbolant in su fundu; ses minùtiles e bi proat Mastroianni, ma intzichit unu cumpanzu e sa bòcia congruet fora.

Torra Brignani a su de 23, iscònchinat unu tiru traessu de Ragatzu dae dresta, ma est dèbile e non assuconat Battaiola. A su de 31 colat su Fiorenzuola, chi partit in contra-giogu acatende sos biancos tropu innanti. Morello imbàddinat Gabrieli e cun unu drestu a giru dae s’oru de s’áera bràssamat Gilmi. Oto giros de fritzitas e sos emilianos addopiant: passazos de rujadis in s’áera bianca intr’a Morello, Currarino e Mastroianni, cun su nùmeru noe chi s’agatat dainnanti a sa porta e non perdonat. S’Olbia est intumbida, a su minùtile 41 unu iscadenadu Morello dae s’oru de manca intrat in áera e impignat Gilmi chi blocat in duas bortas. Serrat su tempus Zanchetta cun unu tiru chentza mannas pretesas chi finit in sas guantes de su portieri.

Daboi de su recreu, Occhiuzzi mudat tres ómines: Minala pro La Rosa, Bellodi pro Emerson e Contini lassat su logu a Boganini. A su de 58 bi proat Ragatzu ma s’ischirchinada sua non bidet sa porta. Unu minùtile a pustis Occhiuzzi bogat Zanchetta già ammonidu, chi at arriscadu su segunda carta groga. Intrat Babbi, Sueva falat in mesania a manca. A su minùtile 63, Brignani bi proat torra de conca, ma sa bòcia est alta. Minùtile 67 e Occhiuzzi ispàrinat sas cartas: in campu intrat Nanni pro Sueva. S’atacu bidet como Ragatzu, Babbi e Nanni, cun Boganini chi partit dae mesania a dresta, Minala in mesu e Biancu a manca.

Su Fiorenzuola si serrat e tucat in contra-giogu: a su de 70 Mamona fuit a Travaglini, ma Gilmi in essida bi ponet sa manu e salvat sos biancos. Sos ùltimos vinti minùtiles sunt totus de sos biancos. Duas punitziones de Ragatzu dae manca, in sa prima a su de 81, Babbi bi arrivit male; in sa segunda – a su minùtile 84 sa bòcia andat tropu a segus e sa defesa emiliana si salvat chena arriscos. A su de 85 tiru traessu de Ragatzu, bòcia a Boganini chi isparat a porta ma unu defensore emilianu ponet a fundu de campu. Dae sa banderedda tiru traessu pro sa conca de Nanni chi únfiat sa retza.

Non sutzedit pius nudda, mancari s’Olbia bi proet finas a sos tres fruscios de s’árbitru. Su Nespoli bellu e festosu de mèrcuris lassat su logu a una gara pèrdida chi ancora non est grae, ma devet signare unu cámbiu de passu, a mala gana.

SALA GIORNALISTAS

A cuntrestare cun sos giornalistas si presentat Nigola Nanni: “Non giuat oje faeddare de me o de átere; so intradu in unu mamentu de fundamentu pro sa gara, deviamu proare onzi arma e a sas fines podiamus finas aparinare. Amus meda de tribagliare, ma podimus mezorare e in finitia amus a cabulare”. Occhiuzzi non agatat iscujas: “non amus fatu sa gioghera comente l’aiamus aprontada. Issos sunt fortes, ma semus mancados in sas lègidas de sa gara, in sos achilìbrios e sas mesuras, e l’amus pagada cara. M’est piàghida sa balia in su segundu tempus, ma oje semus mancados in sa tènnica e comente iscuadra“.