Olbia, bona sa prima!

Su comintzu est in su Néspoli, in die soliana, e in bonora si torrant a intèndere sas boghes festosas de sos ultras.

Occhiuzzi ponet in campu Brignani, Bellodi e Emerson a deféndere su portieri Gilmi. In mesania ispazu pro Sueva a dresta, Travaglini a manca, mesalas sunt La Rosa e Minala. Biancu assistit sos atacantes Ragatzu e Contini.

Paret partire bene s’Olbia, e già a su segundu minùtile Contini dae manca aporrit a Biancu. Tiru dae fora de àera, altu. Ma est su Pontedera a leare in manu sa gioghera. E tirat a porta: Pektovic a su de 6 e Cioffi a su de 13 ponent però altu. Sos toscanos acontzant sa mìria: a su de 33 bi proat Cioffi e tres minùtiles a pustis Ladinetti, ma Gelmi blocat ambas duas sas bortas. A su minùtile 39 si atrivit Fantacci dae manca e Gelmi parat. Tres giros de rellozu e bi proat Cioffi dae tesu, sa bocia che colat a largu dae sa porta bianca. A sa congruida de su primu tempus, si torrat a bìdere s’Olbia in atacu: Travaglini dae manca pro sa conca de Contini chi dae pagu tretu ponet a-pius de sa traessa.

In su segundu tempus est ancora su Pontedera chi cumandat su giogu. S’Olbia est tropu blocada e sufrit in s’oru de dresta. A su de 46, dae una bocia pérdida dae Brignani proat a nde profetare Petrovic, ma su tiru mànchinu sou bessit de paga mesura. Colat unu minùtile ebbia e una revortida in bolu de Aurelio impignat in manera grae Gelmi chi de istintu ponet a subra de sa traessa. Ladinetti bi proat a su de 52 e a su de 57 semper dae fora de àera, ma sa mìria est alta in ambas duas ocasiones. In s’ipestantu Fabbri est intradu pro Sueva a su minùtile 55. E s’Olbia comintzat a leare cunfidéntzia cun sa gioghera. A su de 67 est Contini – pròpiu servidu dae s’intradu nou Fabbri – chi fuet a dresta e tirat. Su portieri toscanu blocat ma cun fadiga. Est su saludu de s’atacante arrividu dae Legnano, chi lassat ispazu a Babbi.

Custu cambiu puru dat pius briu a sos biancos chi como ant in s’àera anzena unu puntellu pius forte. E difatis s’iscuadra sarda creschet. Su Pontedera proat a pùnghere a su de 73 e a su de 74 cun Fattacci e Ladinetti e daboi si che istudat. E in campu cumandat s’Olbia, inorabbona! A su de 77 minùtile Babbi intzichit unu tiru traessu de Ragatzu dae dresta, sa bocia est trofizada dae Shiba chi ajuat sa parada de Siano. Colat unu minùtile e una giogada intra Babbi e Biancu lìberat Ragatzu chi proat su tiru a efetu: altu de pagu. 

A su de 86 sa borta de sa gara: essit Biancu e intrat a campu Boganini. Sùbidu Ragatzu dae dresta servit Babbi chi colpit sa bocia in inluscigada, ma Siano blocat in terra. A su de 89 minùtile Boganini si presentat a su Nespoli: ischirchinada mànchina chi intzichit sa traessa a portieri bàtidu. Est sa proa de su gol, chi arrivit a s’ùltimu giru de relozu regulamentare: su nùmeru 16 olbiesu bi proat torra dae sos vinti metros e custa borta únfiat sa retza. S’arbitru cuntzedit chimbe minùtiles de tempus annantu ma non sutzedit pius nudda. Sos òmines de Occhiuzzi printzìpiant s’istajone cun una bìnchida giòmpida a ultimera.

Chi siet de bonu profetu pro sa sighida de su campionadu. Chie bene comintzat at già fatu mesu caminu…

SALA GIORNALISTAS

Mastru Occhiuzzi acatat una bella giae de sa gara: “Sos sustennidores in tribuna sunt istados su menzus òmine in campu. Est sa nostra zente chi nos at dadu ánimu e gràtzias a issa amus bìnchidu una gioghera in ue amus ischidu sufrire e daboi cuntrabbàtere! B’at de nàrrere chi su Pontedera at cumandadu sa gara ca deasie amus detzisu nois. Devimus crèschere in sa fase chentza bòcia, ma non nos ant inserrados intro e in sas faladas longhinas semus istados meda perigulosos“.

Joseph Minala dat méritu a su Pontedera: “Una bona iscuadra posta in campu dae unu mastru abile abberu. Semus istados bravos a bi creere finas a s’últimu e a la bìnchere, gràtzias massimamente a sos chi sunt intrados in su segundu tempus. Est istadu de fundamentu comintzare in manera giusta, ca at a éssere unu campionadu longu e tostu, e ogni gara at a chèrrere meda atentu e briu“.