Olbia reìna de su càbu ‘e subra

Cando Gianola trampat Van Der Want, impedidu a bidere sa boccia dae su muru ‘e sa defesa sua, tando sa Torres paret mere de su campu antzenu e sos olbiesos iscaddados, no agatant pius su giogu issoro.

Che colant 22 minutos, prima de ‘idere sa balia olbiesa, c’abberit sa janna a s’isperu: Ragatzu ammasetat sa boccia donada dae Contini ma benit muradu dae su disisperu de Antonelli. Brignani accoglit de conca sa boccia, ma Gianola pustis de aere sinnadu sa rete de sa s’1-0, resessit a salvare sa porta sua subra sa linea bianca.

Su pareggiu no paret pius gasi attesu, est in s’aera: Brignani liberat Arboleda chi chena perdere meda tempus crossat. Ragatzu cun curagiu si lampat in bolu e custa orta cun sa conca mudat s’istoria de sa gara, 1-1. Est su minutu 27. Tres minutos infatu su bardianu ‘e domo incomintzat a narrere pruite isse no est riserva de niune, parende cun maestria s’isbatzinada de Urso, sarvende s’apparinada e semenende pro su tempus bennidore. Nanni donat valore a sa punizione de Biancu e torrat a violare sa porta de Salvato. E semus 2-1. Sa Torres chircat sa perdida balia ma est semper Ragatzu a minettare sa porta tattaresa. Arena frusciat duas bortas e gasì Isponet su primu tempus.

In su segundu sa gara balantzat brios e sos bardianos ant de ite faghere: Van Der Wandt bolat pro deviare s’isbatzinada manchina de Omoregbe a su minutu 61 e Salvato impedit sa terza rete a Ragatzu, bortende su lob lentu subra sa linna de sa traversa, duos minutos infatu. Arboleda una ‘ia e torra Van Der Want defendent cun balia su 2-1, pustis Ragatzu lu tancat in casciaforte, sinnende sa terza rete e cussa personale de 13, apparinende su resultadu de s’annu coladu: Bellodi ponet una boccia galana intro ‘e s’area, su Mastru de Quartu la domat cun maestria manna, trampat Salvato cun una finta geniosa e che pasat sa boccia intro sa porta boida. 

Est su minutu 85. Sa gara no at pius istoria, isponet 3-1 es’Olbia balantzat puntos e curagiu.

Mario Bua Capitta