Olbia rupit sa janna de su mere

Sa fubba fit, est e at a abbarrare su giogu pius acurtzu a su misteriu de su de destinu, semper malu a cumprèndere. S’Olbia, chi at giogadu semper cun geniu, meda balia e ischire tàticu, mai aiat imparadu s’impitu cìnicu pro resessire a bìnchere cun su pagu. Deris est cumbinadu, contra a sos primos de sa classe, cussos chi binchent semper, cando giogant menzus, ma puru daghì giogant peus. Contra a cussos chi in terra sarda ant domadu s’Olbia che mastru diciosu, forsis sos solos chi l’ant fatu. Sa fubba est deasie.

Canzi ponet in campu Ciocci in porta, defesa cun Pisano, Brignani e Emerson, in mesu Arboleda, La Rosa, Lella e Travaglini, Biancu daesegus de sas bucas de fogu Ragatzu e Udoh. Sùbidu Tremolada faghet cumprèndere chi sa gioghera non at a èssere sìmplice: afundu de sos canarinos chi che congruet a fondu de campu. Respondet Ragatzu a su de 5 minùtile: tiru a s’ispensada, Gagno blocat a terra. A su de 14 Scarsella isconchinat servidu dae Armellino, sa bocia est alta. Ateros 5 giros de rellozu e bi torrat a proare Tremolada, ma su tiru de s’ex brescianu est torra fora. E a sa mantessi manera andat un àteru tiru sou a su de 32, daboi de una faddida de Arboleda.

A pustis de una revoltida in àera de Udoh, est su Modena chi si faghet perigulosu a su minùtile 38: falada de Ciofani e tiru mànchinu, ma Ciocci faghet cumprendere chi est in die bona. Bàtoro minùtiles e s’Olbia ballanzat s’aju: dae manca Udoh ghiat sa bocia, si atzentrat e lassat partire unu tiru a inrujare chi ingannat Gagno. Semus a daeinnanti. A su de 44, Azzi retzit sa bocia in campu abbertu, che fera si li betat subra Ciocci chi ressesit a isviare su brasilianu chi torrat a miriare sa porta ma s’ischirchinada si perdet in fundu-campu. E in su recùperu de sa prima fache de gara, sos biancos addòpiant: torra Udoh, servidu dae una ribàtida debile de sa defesa de domo, chi controllat, mìriat e dae dresta brassamat su portieri modenesu.

Sa represa non est cosa pro dèbiles de coro: su Modena, chi non perdet dae su 9 de santaine de s’annu passadu, e faghet puntos dae 21 giogheras, falat in campu abbulveradu. Si giogat guasi semper in s’àera sarda, finas a cando – a su de 55 minùtile Ciofani mintet a intro, daboi de una ribàttida de Ciocci, chi pro pagu non ressesit finas a salvare su segundu tiru modenesu. Pro bona sorte s’Olbia non si lassat ischeciare intro, e si fàghet a bìdere in atacu: a su de 59, Udoh non resessit a controllare sa bocia in àera servida dae Ragatzu. E daboi de unu tiru de Azzi cun Ciocci chi parat, sos biancos si anciorant torra in s’àera de Gagno. Pecadu chi su tiru traessu de Arboleda non est perfetu e sa bocia non arrivit a Udoh.

Canzi ponet Chierico pro Biancu e a su de 69 Ciocci a manos abbertas ribatit su tiru de Mosti. Tres minùtiles a pustis e Giandonato e Saira dant su cambiu a La Rosa e Udoh. E a su de 78 est Lella chi essit pro fàgher logu a Ladinetti. A su minùtile 80 Giovannini faghet partire su drestu, apena intradu in àera, ma Ciocci oje est unu dimòniu e ribatit finas custe. Su de 89, drestu de Gerli e su nùmeru unu sardu blocat. Finit deasie, daboi de 4 minùtiles de recùperu, e s’Olbia si ponet in bèrtula tres puntos chi balent addòpiu!

Menzus in campu, Ciocci, chi at fatu a comprèndere proite meritaiat s’afidu cun s’Olbia. Como devimus ismentigare custa impresa, e resessire a torrare a pes in terra a sa sola, innanti chi carchi unu bi penset pro nois. Est custa sa retzeta pro unu finale de campionadu chi nos potat dare calchi cuntentesa.

Roberto Mette e Mario Bua, Amistade

Condividi l'articolo

Scopri il nostro shop

Mostra il tuo orgoglio per i nostri giocatori e renditi protagonista del gioco.

Ultime notizie

comunicato

L’Olbia Calcio è lieta di annunciare il consolidamento della partnership con Geasar,

comunicato

La società rende noto che Gianluca Contini e Alessandro Corti terminano la

comunicato

L’Olbia Calcio è lieta di annunciare l’acquisizione dei diritti alle prestazioni sportive

comunicato

L’Olbia Calcio è lieta di annunciare il consolidamento della partnership con Geasar,

comunicato

La società rende noto che Gianluca Contini e Alessandro Corti terminano la

comunicato

L’Olbia Calcio è lieta di annunciare l’acquisizione dei diritti alle prestazioni sportive

Scopri il nostro shop

Mostra il tuo orgoglio per i nostri giocatori e renditi protagonista del gioco.