Olbia torrat binchidòra dae terra emiliana

Primu tempus bene giogadu dae ambas partes, sos sinnos narant però chi s’Olbia oe la potet achivire: Ragatzu abberit sos ballos, ponet a bonu frutu unu lanciu longu e pretzisu de Contini, cun unu controllu galanu de sa boccia si liberat de duos omines ind’una orta e si presentat solu innanti a su bardianu de sa porta ‘e domo. S’isbatzinada carignat sa base de su palu ‘e manca e si perdet in foras.

Su Fiorenzuola chircat e agatat unu pagu ‘e animu, bi proant cun prima Currarino e Piccinini pustis, ma est ancora s’Olbia chi tanchende su tempus, faghet tremare su coro emilianu: Nanni, liberadu dae un’idea de Ragatzu, isbatzinat a cantu potet chena bi pensare duas bortas una bomba chi su portiere parat de istintu in duos tempos. Frusciat s’arbitro sa fine su primu tempus, Firenzuola 0, Olbia 0.

In su segundu tempus paret chi su Firenzuola siet detzisa a regulare sos contos, cun s’omine pius atzudu de sos toscanos in campu, tzertu Piccinini, chi in mesu ‘e area sarda, liberat su destru, sa boccia paret in su saccu, ma bi pensat sa linna ‘e sa traversa a salvare Sposito, bardianu olbiesu. Sun colados solu duos minutos e semus a su 47mu.

Ma bastant àtteros chimbe minutos pro mudare su destinu ‘e sa gara. Contini donat una boccia galana in area a Ragatzu, proat a si giogare s’urtim’omine de sa defesa Danovaro, chi tocat cun sa manu. S’arbitro est incue accurtzu e puntat su poddighe eretu a su cerchiu de su rigore. Sa protesta ‘e sa contra est lebia e Ragatzu matessi si leat sa responsabilidade de su tiru. Battaiola parat ma no mantenet e sa boccia rupit sa linea de sa porta. Est su minutu 54.

A sue 57 bintrant sas forza noas, Corti leat su logu de Nanni e Dessena in sa prima partida in maglietta bianca, cussu de Contini.

Su Fiorenzuola attaccat tando cun sa fortza de su disisperu, s’accurziat a sa porta olbiesa cun Stronati e Scardina, chena oriolare meda Sposito. A sa fine est Olbia chi potet gighere a duas sas retes suas: Corti tuccat dae sa mesania ‘e su campu, lestru binchet sa cursa cun sa defesa ‘e domo, si presenta solu innanti a Battaiola, ma istracu no resessit a donare fortza a su tiru sou, né pretzisione. Est su minutu 95 e s’arbitro frusciat sa fine.

“Amus bogadu atza dae su primu a s’urtimu minutu, como impitamus meda tribagliu intro ‘e chida e pustis potimus pensare a sa battalla chi nos isetat Contr’a s’Entella” narat mastru Occhiuzzi a sa fine. 

Mario Bua Capitta