Perunu gol, ma unu puntu

Recúperu de sa de 22 die, cun s’Olbia chi andat a Viterbo pro coglire puntos. Leggende sa lista de sos giogadores, deretu benit a ojos sa mancàntzia de sa buca de fogu sarda: Ragatzu setzit difatis in banchita. Canzi ponet Ciocci in porta, Emerson, La Rosa e Brignani in sa linea de defesa, Pinna a dresta e Travaglini a manca, cun in mesu Lella e Chierico. Biancu si ponet a daesegus de sos atacantes Udoh e Saira.

Sa Viterbese partit forte, sùbidu tres faladas in àera bianca, ma paritzu isconfusionadas e s’Olbia si salvat. A su de 13 minutile Mungo dae fora àera tirat ma sa bòcia essit a sa manca de Ciocci. Sos sardos leat sas mesuras de sos latziales e comintzant a isvilupare giogu: a su de 15, Lella – servidu dae Brignani in s’oru drestu – ponet unu tiru traessu in àera pro Udoh, antecipadu però in fundu-campu. Dae sa banderedda Biancu ponet intro unu tiru a iscampanile, intzichit a bolu La Rosa, ma finit fora.

Tres minùtiles a pustis, Emerson dae sa defesa ischìrchinat deretu pro Udoh chi arressat sa bòcia in àera e la servit a Biancu. Tiru a giru ma Fumagalli salvat in fundu de campu. A su de 24 minùtile, dae una punitzione de Emerson sa bòcia che finit a Pinna chi dae dresta betat in àera. Brignani intzichit de conca ma tzentrale e su portieri blocat tranchillu.

Su tempus de bìdere – a su de 26 – una essida a boidu de Ciocci subra unu tiru traessu de Semenzato, chi est salvada dae sos cumpanzos suos, e duos minùtiles a pustis s’Olbia torrat perigulosa: Saira baliosu intrat in àera dae dresta, su tiru traessu est ismanatzadu dae Fumagalli ma Travaglini non ressesit a lu brassamare dae pagu tretu. Sa bòcia arrivit però a Pinna chi dae dresta ponet fora de pagu.

A su de 30 minutile Biancu perdet su possessu in sa tres-cuartos e sa Viterbese partit in contra-giogu. Tiru dae fora de Megelaitis chi essit a sa manca de Ciocci. Tres giros de rellozu e Mungo de punitzione ponet in àera bianca, Ciocci resolvet cun sos punzos. E a duos minùtiles dae su recreu, sa falada pius perigulosa de sos padronos de domo: semper Mungo acatat Volpicelli daennanti a Ciocci, chi est bravu a pònnere in fundu-campu su tiru a colpu seguru de su numeru 7 latziale. 

Est unu passazu de fundamentu pro ambas duas iscuadras e nde pianghet s’ispetàculu, abberu minguente. E su segundu tempus non mudat sa cosa. A su de 49 dae sa banderedda Emerson pro La Rosa lassadu totu solu in àera, ma s’isconchinada sua est fora. A su de 53 Mungo dae su corru drestu de s’àera resessit a acatare Adopo, chi de conca ponet fora de paga mesura. Tres minùtiles e respondet s’Olbia: tiru longhinu dae sa manca in àera pro Udoh chi in cursa proat unu tiru a brincare su portieri, ma sa bòcia essit alta.

A su minutile 60, Pinna dae dresta mintet in àera pro Lella chi de conca ponet altu. Canzi faghet intrare Ragatzu pro Saira e Ladinetti pro Chierico. Sa gara est sonnigosa, ma a su de 68 sa Viterbese insonat duas bortas: Mingo dae dresta ponet in àera pro Volpicelli chi tirat a colpu seguru. Ribatit Ciocci ma sa bòcia arrivit a Murilo chi bene postu in àera non resessit a unfiare sa retza, istrobbadu dae sa defesa bianca. Sos latziales parent como pius atrividos e creschent sas faladas, mancari Ciocci istet pius a mancu arressu.

Canzi si abbidet chi in mesania b’at bisonzu de briu e a su de 80 mintet Giandonato e Occhioni pro Lella e Pinna. A su de 89 Ragatzu dae s’oru drestu faghet partire unu forte tiru traessu pro Travaglini chi dae manca colpit bene de conca ma dèbile e su portieri blocat. Bàtoro minutiles de recùperu narat s’arbitru ma paret chi ambas duas sas iscuadras si cuntentent de s’aparinada. E difatis non sutzedit pius nudda. 

Sos biancos torrant in Sardigna cun duos puntos in duas giogheras. Cosa bona, ma pro punnare a sos play off tocat de torrare a bìnchere. S’ocasione giusta domeniga, cun su Montevarchi in su Nespoli. 

Roberto Mette, Amistade