Sa befa arrivit a ultimera!

A su Nespoli arrivit su Pescara, una de sas favoressidas a comintzu de campionadu. Canzi renuntziat a Lella – est custa sa nova de importu – e ponet in campu Ciocci – eroe de Modena paris cun Udoh – in porta, defesu dae sa defesa a tres – Pisano in mesu, Emerson a manca e Brignani a dresta. Mesania frommada dae Tavaglini in s’oru mànchinu, Arboleda a s’atera fache, in mesu La Rosa e Chierico. In atacu Ragatzu e Udoh, ajuados unu passu in daesegus dae Biancu.

S’Olbia partit forte, e luego leat su palu. Est La Rosa chi l’intzichit dae tiru traessu de Emerson dae sa banderedda. Sas faladas de sos biancos sunt totus dae dresta e congruent semper cun tiru dae fora: a su de 9 minùtile Arboleda servidu dae Udoh, altu; subbidu a pustis Biancu, ma Sorrentino parat.

Su Pescara si bidet pagu, a su de 7 minùtile b’aiat proadu Clemenza, parada de Ciocci, e nudda pius. S’Olbia est pius briosa: a su minùtile 17 La Rosa leat sa bocia dae fora de àera, si l’acontzat e tirat, ma essit de pagu. A su de 22 Ragatzu inluscugat in àera in su mamentu de tirare, sa bocia est imbolada a fora dae sos abritzesos. Dea s’oru drestu chin sas manos pro La Rosa chi custa borta non faddit: bocia a sa manca de Sorrentino e s’Olbia est a daeinnanti. A su de 29, bi proat Cancellotti de conca, bene postu in àera, ma finit alta. Respondet s’iscuadra de domo 5 minùtiles a pustis cun Brignani chi de conca non miriat bene e non ponet intro unu tiru traessu dae su corru drestu.

Su Pescara proat a partire dae fundu, ma sos òmines de Canzi tampant totus sas lineas de passazu e sos abrutzesos faghent fadiga manna. A su de 39, Pontisso tirat debile dae manca, Ciocci parat. E su portieri biancu est protagonista de sos ultimos minùtiles. A su de 43 essit bene a antecipare s’atacante servidu dae una punitzione bàtida repentina. Unu minùtile a pustit essit tropu seguru subra una bòcia debile, intzichit male de bènuju e devet fàghere fallu subra a Rauti chi lu fit brinchende. Ammonimentu pro su giovanu portieri e punitzione de Clemenza chi pro fortuna intzichit Biancu e torrat in campu in s’ipestantu chi s’arbitru frusciat sa fine de su primu tempus.

A sa represa, si aisetat unu Pescara abbulveradu, ma est s’Olbia chi si faghet a bìdere: a su de 48 Arboleda est liberadu in àera dae Udoh, ma isparat altu dae dresta. Su Pescara leat su giogu in manu ma pro vinti minùtiles non cumbinat nudda. Finas a su de 67, cando Di Risio dae fora impignat Ciocci.

Unu minùtile e Ragatzu benit aterradu in s’intrada se s’àera. Punitzione chi batit su cuartesu, ma finit alta. A su de 71, Canzi cambiat sa mesania: Ladinetti e Giandonato leant su postu de La Rosa e Chierico. Su Pescara creschet sos giros de su motore: a su de 74 est Illanes chi de conca ponet fora de pagu. Tres giros de rellozu e Di Risio totu in unu ischirchinat dae fora, ma sa bòcia est fora. 

A su de 80, Occhioni intrat pro Biancu e Renault dat su cambiu a Arboleda. Unu minùtile e Costanza bi proat dae fora, Ciocci parat a terra. A su de 82, Ladinetti acatat Ragatzu in àera, chi dae dresta tirat potente ma sa mìria est alta. A su de 85 su Pescara aparinat: dae dresta Zappella ponet in àera unu tiru traessu pro sa conca de Ferrari chi non perdonat Ciocci. Canzi si giogat sa carta Mancini pro Udoh, e s’arbitru cuntzedit 7 minùtiles de recùperu. E a su de 95, Frascatore dae sa manca tirat potente dae fora e ponet intro, a sa manca de Ciocci chi non at bidu sa bòcia partire. 

Sa befa est servida. S’Olbia si giogat sos tres puntos in sos deghe minùtiles finales. E bessit dae campu a conca bascia. Ancora una borta sa parte finale de sa gara batit novas malas a sos òmines de Canzi. 

Roberto Mette, Amistade