Sa nuedda de Fantozzi subra su Nespoli

A Terranoa arrivit s’Ancona-Matelica de duas connoschéntzias nostras: Palesi e Iotti. Suprit in Sardigna cun unu atacu meda perigulosu, in ue totus connoschent sa bia de sa retza. S’Olbia si ponet in campu cun Ciocci in porta. Emerson, Boccia e Travaglini in defesa, Arboleda, La Rosa, Lella e Renault in mesania, atacu con Biancu unu passu daesegus de Udoh e Ragatzu.

Sos biancos partint atzudos. Tres minutiles e Biancu batit dae sa banderedda, sa defesa marchisana ribatit. Dae s’isvilupu confusu sa bocia arrivit a La Rosa chi tirat ma sa miria est fora. Ateru tiru dae su corru a su de 7 minùtile, custa borta dae dresta. Arrivit sa bocia a Travaglini chi intzichit unu giogadore in ruju.

Duos minùtiles e sa nue de Fantozzi cumparit subra su Nespoli. In sa mantessi iscuta si segant siat Renault chi Boccia. Canzi devet pònnere in campu Simone Pinna e Pisano. S’oristanesu andat a manca, su capitanu in mesu a sa defesa.

A su de 16 minùtile, Udoh dae dresta si girat bene, passazu a Biancu chi in manera abbista ponet in áera ma deasegus. Suprit lestru Lella ma nd’essit unu tiru débile e Avella parat chena anneos. Ragatzu paret in die bona, a su 17 intrat in àera dae manca, perdet sa bocia, tirriosu la torrat a leare a sa defesa marchisana, chircat de servire Lella ma su mesanu sardu non bi arrivit pro pagu. Su de 20: tiru traessu dae dresta e Ragatzu colpit cun una bella revortida in bolu, sa bocia benit imbolada atesu dae sos anconitanos, ma s’Olbia insistit servende torra su cuartesu chi chirchende de frimmare sa bocia si l’inlongat tropu in áera. Tanieleddu s’istròpiat subra s’oju e abbisonzat de una meigascione.

S’arbitru frùsciat pagu e nudda, nd’essit una gara ispassosa cun s’Olbia est padrona cumpleta de su campu. A su de 27 La Rosa dae punitzione in sa làcana de s’áera, ma intzichit sa barriera. Tres giros de rellozu e Udoh in contra-giogu antécipat su defensore. Passazu a Ragatzu chi ponet intro pro Lella. Ma sa bocia est longa. S’Olbia non lassat campu a s’Ancona chi paret intumbida. A su minutile 31, sos biancos partit a tipu rugby, falat Arboleda a dresta, daboi Ragatzu de carcanzu pro Pinna chi proat su tiru a giru ma li bessit male. 

Sos rujos si bident solu colada sa mesora: Sereni, servidu dae Palesi, proat dae fora a assuconare a Ciocci, ma su tiru finit a fundu de campu. A su de 35, in contra-giogu tres biancos afrontant tres anconitanos: Udoh non est lestru, sa bocia arrivit a Lella daghi sa defesa ruja s’est oramai acontzada e su tiru sou est ribàtidu. Minùtile 40, Ancona perigulosa: dae sa banderedda sa bocia arrivit a Gasperi chi ischirchinat a balla sola. Fora ma serente-serente a su palu a manca de Ciocci. A su de 44, punitzione de Emerson, Udoh faghet una bella tòrchida de conca e proat a ingannare su portieri chi non bi ruet e parat. A tempus aggiummai cumpridu Pisano perdet una bocia perigulosa, daboi de unu tìbbiri-tàbbara isconfusionadu, sa bocia arrivit a Iannoni chi mìriat a fora.

In su segundu tempus prosighit sa proa de fortza de sos biancos: a su de 48, bi torrat a proare Ragatzu, ma che la ponet a subra de sa traessa. Emerson a su de 53 e La Rosa unu minùtile a pustis bi proant, ma debbadas: su brasilianu dae punitzione intzichit s’iscarpita de unu defensore ruju; su tiru de su mesanu terranoesu che ferit fora. E a su de 61, s’ocasione menzus pro sos cadduresos: falada imboligadita, sa bocia in finitia arrivit a Udoh, chi a porta abberta in totu faddit su colpu mannu.

Est sa bortada de sa gioghera! Si cumandas su giogu ma non mustras istintu de catziadore, a sa fine benis punidu. E difatis, sos marchisanos – chi ant patidu pro tota sa gara sa balentia sarda – a su de 69 passant: Rolfini in àera si acontzat sa bocia cun su benuju e si mustrat in una bella revortida in bolu chi non lassat alenu a Ciocci. Non bastat cussu, e 6 minutiles a pustis sos ómines de Colavitto addópiant, semper cun Rolfini chi torrat a unfiare sa retza, dae s’isvilupu de una punitzione. 

Sos biancos intendent sos duos bucicones e perdent conca e balia. A su de 77 arriscant de imbarcare su de tres gol, ancora cun Rolfini, chi però ispedit subra a sa traessa. A 8 minutiles dae sa fine La Rosa si ballanzat sa carta ruja de s’arbitru pro un’intrada mala a dannu de Delcarro. Canzi cumprendet chi bi cherent armas noas in campu e a su de 82 che mintet Mancini pro Udoh e Chierico pro Biancu.

S’isperàntzia la muntenet bia Ragatzu chi a s’últimu minùtile ponet in porta unu passazu de Mancini. Bi arreant etzi 5 minutiles de recùperu, ma non sutzedit pius nudda. S’Ancona si ch’andat dae Caddura cun su sacu pienu, mancari apet sueradu abberu pagu pro si lu meritare. Sos ómines de Canzi murrunzant sa nuedda de Fantozzi, oje frimma subra su Nespoli. 

Ma non b’at tempus de si piànghere subra: domeniga áteru batazu: arrivit s’Entella e bisonzat de torrare a fàghere puntos. 

Roberto Mette, Amistade

Condividi l'articolo

Scopri il nostro shop

Mostra il tuo orgoglio per i nostri giocatori e renditi protagonista del gioco.

Ultime notizie

comunicato

L’Olbia Calcio è lieta di annunciare il consolidamento della partnership con Geasar,

comunicato

La società rende noto che Gianluca Contini e Alessandro Corti terminano la

comunicato

L’Olbia Calcio è lieta di annunciare l’acquisizione dei diritti alle prestazioni sportive

comunicato

L’Olbia Calcio è lieta di annunciare il consolidamento della partnership con Geasar,

comunicato

La società rende noto che Gianluca Contini e Alessandro Corti terminano la

comunicato

L’Olbia Calcio è lieta di annunciare l’acquisizione dei diritti alle prestazioni sportive

Scopri il nostro shop

Mostra il tuo orgoglio per i nostri giocatori e renditi protagonista del gioco.