Sa oghe ‘e su ‘entu rupit sa gruta a s’urtimu alenu

Sa partida donat luego sa cara sua bera dae su minutu 7: sa Torres in pressing furat sa boccia in sa mesania de su campu e la donat a Ruocco, chi rupit sa defesa terranoesa e si presentat solu innanti a Gelmi, isbatzinat seguru ma no centrat sa porta. Olbia puru recuperat boccia e tuccat cun sos omines de classe manna, Biancu e Ragatzu, chi cosint sa trama cun geniu, su tiru finale s’accurtziat a sa linna de su palu e si perdet in foras, cun Salvato chi l’abbaidat in bolu. Est su minutu 18.

Cando nos accurtziamus a sue 23, Scappini dae s’ala destra binchet sa resistentzia de Gelmi e unfiat sa rete, ma s’arbitro aiat già frusciadu su rigore. Dae Bonavolontà sa boccia fit colada a Scappini, ma Bonavolontà matessi prima fit istadu istrumpadu in sa mesania de s’area. Su tiru de su bomber Scappini, abucallotadu dae su ballitu de Gelmi, si perdet altu in s’aera, sa porta est salva.

Ruocco bi torrat a proare deghe minutos in fatu, ma est Ragatzu chi dae s’oru destru de s’area tattaresa, isbatzinat e caentat sas manos de Salvato, su bardianu de sa porta ‘e domo, ma a su minutu 42 est ancora Scappini chi s’accurtziat a sa porta olbiesa. Ruocco liberat Scappini in sa mesania de s’area, ch’inghiriat sa defesa e paret fata pro Tattari, ma Gelmi torrat a faghere un meraculu, cun s’ajudu de sa linna ‘e sa traversa. Isponet gasì su primu tempus, sa rete de sa Torres paret incue ma Olbia resistit cun balia.

Su segundu tempus su giogu paret apet mudadu idea: Renault e Ragatzu si giogant sa defesa subra s’ala manchina de sa defesa ‘e domo, su cross de Ragatzu giompet durche subra sa conca de Biancu, chi solu innanti a su bardianu che lampat sa boccia attesu dae sa porta. Accudint sos cambios a ambas partes. Totu mudat, ma su tema abbarrat su matessi. Sa Torres ponet in cambiu tota sa balia, sa rete paret in s’aera, ma s’Olbia si faghet perigulosa donzi orta chi potet, subra totu cun Ragatzu, chi sighit a mantennere sa defesa ‘e domo in oriolu.

Su derby s’accurtziat a su minutu 90 e abbarrat 0-0, cando su destinu sou paret sinnadu, tando accudit sa rete de Scappini. Liviero ponet in sa mesu a s’area gadduresa una boccia de oro e Scappini custa orta no faddit. Cun s’ajudu de sa bona sorte ressit a girare de conca a sa porta ‘e Gelmi, sa boccia basat su palu e si pasat in intro a sa porta. Nudda potet su bardianu. Su destinu ‘e sa partida paret tando giompidu e su pubblicu tattaresu incomintzat a faghere festa manna, ma sa festa est forsis primadia.

A su minutu 95, in tempus de recuperu, sa boccia ‘e su disisperu colat in s’area tattaresa. Paret, sola, trista e chena zelu, ma giompede in sos trettos de Ragatzu, chi a bolu isbatzinat e non faddit. Pro Salvato no b’at iscampu e sa festa jumpat totu su campu abbojende sa curva olbiesa.