Sa resurressione ‘e sa tramperia

A deghe minutos dae su frusciu finale, Olbia fit torrende intro su sinnu de sa nadia. 

Cando Biancu, a su minutu 67, cumbidadu dae s’ssist de Contini, fuit lebiu che su ‘entu, chena lassare iscampu a su bardianu desoladu, tando amus isperadu a sa resurressione de un’iscuadra: Olbia. Totu indebadas.

Sos toscanos de Mastru Canzi, sunt tucano bene meda, colados duos minutos Mutton domat cun classe unu lanciu de Martinelli e in diagonale isbatzinat unfiende su saccu. Nudda potet VanDer Want, ma sa defesa sarda no est netta ‘e gurpa. Mutton in die piena de gratzia nd’at a faghere àteras duas…

Olbia no potet né cheret perdere e agatada sa balia preguntada, apparinat cun Fabbri a su minutu 20. Ma sa gara at galu meda ‘e ite narrere e su Pontedera cun Shiba a su minutu 38 e Mutton a sue 41 turrat a fuire, lassende sos olbiesos a terra, chena alenu. Cando su primu tempus giompet a s’urtimu minutu, Nanni si giogat a sa sola mesa defesa, balantzat su logu pro su tiru e no perdonat, sa boccia pretzisa e Bpotente che brincat su bardianu Stancampiano, rupende sa porta dae s’incrociu de sos palos: 3-2 e s’arbitro frusciat sa fine de su primu tempus cun sa partida abberta.

Torrados in campu sos bardianos de su faru chircant luego s’apparinada, semper cun Nanni a su minutu 49 e pustis cun Biancu a sue 56. Su pareggiu est in s’aera. Sa boccia imbiada dae su corner ballat in s’area ‘e domo, Bellodi accudidu dae insegus si lampat cun balia manna e de conca apparinat sos contos 3-3.

Passant solu pagos minutos Biancu no faddit e in contropiede allumat s’isperu. Est su minutu 67 e su destinu ‘e sa gara paret sinnadu. Olbia cumandat como su giogu. Su bardianu ‘e domo salvat sa porta sua dae sa quinta rete, ma est torra Mutton chi toccat sa terza boccia chena mai faddire. Est su 4-4 e Olbia suffrit meda su colpu, a su minutu 80. E su triller no est cumpridu: Perreta lassadu a sa sola in s’area dae una defesa pagu abbista coglit s’urtimu cross e liberat unu destru chi no assat iscampu a Van Der Want: 5-4 pro sos meres de domo.

Su bàrriu si potet ancora accontzare, ma sa tràcchida de s’urtimu logu in classifica complicat unu pagu sa vida.

GLOSSARIU

Abbìsta: accorta

Accudìre: accorrere

Bàrriu: carico

Nadìa: nascita

Tramperia: inganno