S’apparinada agradat sa brigada

Sa tuccada ‘e s’Olbia contra sos cuartos de su girone at donadu unu pagu de illusione, in campu e foras, ma no fit debadas.

Sos sardos leant bene in manu sas briglias de su giogu e resessint a ponnere a frutu s’oro de su cumandu issoro: prima Dessena coglit unu cumbidu de Emerson e de conca caentat sas manos de Breza, su bardianu istrantzu. Tres minutos infàtu Nanni trampat D’Ambrosio e de destru isbatzinat a cantu potet fatende tremare sa linna e sa traversa. Est s’isterrida ch’abberit sa janna a sa rete de Nanni matessi: dae sa bandela Emerson et Biancu si la giogant, s’ischema attit sa boccia in sa zona ‘e Dessena, chi chena bi pensare meda chircat sa porta a bolu, su tiru toccat terra e fuit dae su controllu ‘e sa defesa, Nanni bene impostadu in sa mesania de s’area, profitat e de conca violat sa porta de sa Carrarese: 1-0 cun meritu mannu. 

Sos sardos chircant sae duos pro tancare sos contos e Biancu cun’una giogada de sas sua s’acurtziat meda a sinnare sa rete de s’annu a su minutu 22, sa tzente applaudit imbreaga de cuntentesa. Pustis, bellu a bellu sos istranztos faghent a comprendere pruite sunt galu in competizione pro che pigare in serie B. 

Su giogu passat in man’issoro in su segundu tempus, Olbia est custrinta a si serrare in sa mesania sua. A su minutu 55 Sposito faghet su meraculu sou parende un’iscunchinada dae accurtzu a sue 59 si devet arrendere: Grassini lampat unu cumbidu galanu ins’ area terranoesa, Capello mediat de conca e Bernardotto che pasat sa boccia in sa rete de Sposito, bardianu de domo, chena gurpa. Sa Carrarese sighit a attacare chirchende sa binchida, cun giogu e cursa superiore, s’Olbia defendet cun fadiga e oriolu, ma a sa fine sarvat sa porta sua cun fortza e dignidade, meritende su puntu balantzadu dae s’apparinada e abbertzende su deretu a aparitzare cun animu, pro Cesena.

Mario Bua Capitta