S’aria senese donat atza a sos sardos

LIMBA SARDA

S’iscuadra suta de una rete dae su primu minutu, no perdet su curaggiu e resessit a apparinare sa gara contr’a una de sas mannas de su girone, su Siena. Paloschi s’ammentat chi est nadu pro fagher su bomber, domat sa boccia imbiada dae sa mesania de su campu e no perdonat Sposito, su bardianu terranoesu. Minutu numeru unu.

Che colat mes’ora prima de ‘idere s’atza de un’iscudra chi no cheret mai perdere: Ragatzu palleggiat comente ischit faghere isse, in s’ala manca de s’area senese, donat sa boccia a Biancu chi si faghet logu e isbatzinat de destru. Potiat essere un eurogoal, sa boccia carignat sa linna de sa traversa e si perdet in curva. Su Siena proat a aggabare sos contos a su minutu 43 cun Frediani chi bi proat dae sa destra de s’area olbiesa, ma Sposito si faghet agatare prontu. E gasì isponet su primu tempus, Siena 1 Olbia 0.

Su segundu est tempus e logu de riscattu pro sos istranzos, chi leant in manu sa briglia de su giogu, fintzas a su minutu 55, cando  Emerson cun unu tiru cross, carrat oriolu in sa defesa ‘e domo, Brignani profitat e de conca che pasat sa boccia in su saccu: 1-1.

Olbia no s’accuntentat e sighit a attacare, ca cheret binchere. S accurziat a sa rete ‘e domo deghe minutos in fatu cun La Rosa e su minutu 75 e pustis Boganini, totu indebadas. A sue 85 Bellodi frimmat cun sas malas Paloschi, retzit su ruju e devet lassare su campu. In deghe àteru no abbarrat che defendere su pretziosu pareggiu e sa otza ‘e gherrare. Sa Fermana est avvisada, a Martis tando.

—-

LIMBA TERRANOESA

S’isquadra suta de una rete, dai su primu minutu, no peldede su coraggiu e resessidi a pondere a paris sa paltida contr’a una de sos mannas de su girone, su Siena. Paloschi s’ammentada d’esser’ nadu pro faghere su “bomber”, bloccada unu pallone arrivadu dai centro ‘e campu chi no peldonada Sposito, su poltiere olbiese, 1-0 a su primu minutu.

Che passada una mes’ora, prima de ‘iere sa foltza de s’isquadra chi mai cherede peldere: Ragatzu in palleggiu, comente ischi’ faghere isse in s’ala manca de s’area senesa, dada su pallone a Biancu chi si faghed’ logu e tirada una istaffilada de destru. Potiad’ essere un eurogoal, su pallone accaretzada su linnu de satravessa e si peldede in culva. Su Siena proada a cumprire sos contos a su  43mu minutu, Frediani bi proada dai sa destra, intro s’area olbiesa, ma Sposito si faghet agattare prontu. E deasì finidi su primu tempus, Siena 1 Olbia 0.

Su sigundu tempus comintzada cun su riscattu de sos istranzoso chi lean’ in manu sos briglias’de de su giogu, fintz’a su 55mu minutu, cando  Emerson cun d’unu bellu tiru “cross”, poned’ timore a sa difesa de domo; Brignani lestru de conca  approffitada e che lampada su pallone intro su saccu, 1-1. S’Olbia no s’accuntentada e sighidi a chilcare sa rete, pro chi cherede binchere. S’acculziada a sa polta de domo deghe minutoso infattu cun La Rosa in su 75mu minutu cun Boganini, ma de badasa. A su 85mu minutu Bellodi frimmada de malu ‘essu Paloschi e si buscada su cartellinu ruiu e devede lassare su campu. In deghe no restada atteru che difendere su pretziosu pareggiu cun sa gana de lottare. Sa Fermana este avvisada, e tando a maltisi.

Mario Bua Capitta