Si andat calèschidu a Ancona…

Si torrat semper calèschidu in ue s’ammentu at lassadu tratas in su coro. Si torrat a Ancona, in ue s’annu passadu s’Olbia at iscritu sa pàgina pius bella de s’istoria sua. Solu chi custa borta bi arrivimus azigu pius in anneu. E cun pius bisonzu. 

Occhiuzzi ponet in campu Sposito in porta, defesa cun Brignani, Bellodi e Emerson, mesania frommada dae Arboleda, Biancu, Dessena, Sperotto, e in fines s’atacu de sa tribide Ragatzu, Nanni e Contini.

Sa gioghera non leat fua sùbbidu. Tocat de aisetare su de 20 minùtile pro bìdere una falada de remeju: Contini proat su drestu dae fora de área, ma ribatit Perucchini. Oto bortadas de rellozu e torra sos biancos perigulosos, cun Nanni chi de conca intzichit unu tiru traessu de Arboleda dae manca, chi non est diciosu e finit fora de unu nudda. A sa tertza proa s’Olbia acatat su aju: est su sòlitu Ragatzu chi ponet intro a sa manera sua ispazosa: tiru traessu de Emerson dae sa banderedda, e Tanieleddu pienat su sacu in revortida in bolu.

Non sutzedit áteru e s’árbitru mandat sas iscuadras a bìere su thè, daboi de tres minùtiles de tempus annantu.

Si torrat a campu cun s’Olbia chi cumandat su giogu e acorrat s’Ancona chentza perunu pensamentu. E difatis sa gara iscurret chena pistighinzos. Occhiuzzi a s’ora giusta de giogu tando chircat de si assegurare: intrat su mesanu La Rosa pro s’atacante Contini, e finas Corti pro Nanni.

A su de 75, essit finas Ragatzu, pro Sueva. Non colat unu minùtile e in bonora sos ruji-biancos marchisanos si mustrant in atacu: Spagnoli colpit dae a curtzu, Sposito ponet fora sa bòcia. Ma sete minùtiles a pustis, sos de domo non faddint: tribàgliu grabbosu de Melchiorri, chi cun unu tiru traessu ponet in conca a Simonetti sa bòcia pro s’aparinada. Sùbbidu Occhiuzzi ponet Travaglini e Incerti pro Dessena e Biancu. E daboi de tres minùtiles de recùperu, s’árbitru frusciat tres bortas.

Si torrat in Sardigna cun su de tres bonu finale sighidu, ma cun azigu de ránchidore in buca pro una bìnchida guasi tenta, bolada solu a ultimera. Pascènscia, como conca a su derby. 

Roberto Mette