S’iscuadra devet accontzare bàrriu: su tempus b’est

Sos sardos faddint cun Biancu su rigore chi potiat donare sa binchida, perdent contr’a sa forte iscuadra ligure e balanzant s’onore cun su giogu, ma sa ruta de oe nos trazàt subra sa punta de sa còa in sa classifica.

Virtus Entella tucat a razu, e li bastant tres minutos, Merkaj coglit unu cumbidu longu, donadu dae sa defesa sua, si buffat s’omine sou cun sa lestresa e  isbatzinatat liberende una bomba destinada a rùpire sa linea de sa porta e unfiare su sacu. Ma sa balia de Gelmi non est de mancu, sa parada sua balet una rete fata.

S’Entella cumprendet chi mancant Brignani e Ragatzu e leat a manu tenta su cumandu de su giogu. Su primu tempus lu giogant a una porta, sos piseddos si difendent cun balia e ordine, tando bi pensat Zamparo, dae trinta metros bidet sa porta e no bi pensat meda. Dae su tiru sou detzisu naschet un eurogoal. Est su minutu 36. Sa reatzione de s’Olbia no mancat e gasì isponet su primu tempus in sa mesania de sos mères de domo. Olbia paret binchida ma no est cumbinchidat, narat su diciu cando s’arbitro frusciat sa fine de su primu tempus.

In su segundu tempus curret semper sa Virtus a minetta de sa porta olbiesa, ma a su minutu 58 Emerson dae sa bandela crossat a manera sua, cun sa classe connotta e Bellodi de conca no perdonat De Lucia, chi no retziat retes dae pius de tres partidas. Passant solu tres minutos e dae sa faddida de Reali tuccat sa fuida de Minala, chi cun sa boccia sitzìda a su pè puntat detzisu sa porta e De Lucia ateru no potet faghere che aggantzare s’anca de su medianu nostru. Nudda ‘e ite narrere, est rigore. Su bardianu cuntestat s’arbitro chi l’ammunit. Sa protesta est meda tebia.

Biancu paret tranchillu, leat pagu imbùcu ma imbrunciat subra sa boccia, chi bolat alta, subra sa traversa ‘e linna, S’Entella potet faghere festa manna. Rete faddida, rete leada, ischimus totu ite cheret narrere. Merkaj sighit unu cumbidu chi tuccat dae sa mesania sua,  fuit lestru dae manca, brujat chena piedade in sa cursa Emerson topu dae una bell’iscuta, e trampat Gelmi. Est su minutu 79, Virtus 2, Olbia1. Sos sardos leant in manu su cumandu de su giogu, ponent in pesudu oriolu s’Entella, ma no b’at piu mediu perunu.

Sa perdida noa potet cherrer narrere cosas medas: sa prima est chi s’iscuadra devet accontzare bàrriu, su tempus b’est. Sa segunda est chi su nùscu de sa terra ‘e basciu, nos cheret faeddare e agatàre sas armas pro nos istejare luego, dae sa coa de sa classifica.