S’Olbia ancora non punghet…

Impignu grae a su Nespoli, arrivit unu Siena in gana de tres puntos. Occhiuzzi cambiat su padronu de s’oru drestu, custa borta est Gabrieli, in una mesania a bàtoro frommada puru dae La Rosa, Minala e Travaglini. A segus de issos su portieri Gelmi e sos tres defensores Brignani, Bellodi e Emerson. In dae-innanti Biancu proat a imbucare a Ragatzu e Babbi.

Su printzìpiu est sonnigosu, sa prima insonada est de sos toscanos chi a su de 13 colpint sa traessa, cun Disanto chi brincat Brignani e tirat a giru. Sùbbidu respondet Ragatzu cun unu tiru dae fora de áera, chi cheriat èssere unu servìtziu pro carchi cumpanzu, ma finit lenu lenu in sas guantes de su portieri senesu.

Comintzat a piòere e a sa mes’ora giusta bi proat Minala chi dae tiru traessu de Travaglini – su menzus in campu in su primu tempu – intzichit a colpu seguru ma si aponet unu defensore toscanu. S’Olbia proat duncas a rafiare. Ma non sutzedit nudda e daboi de duos minùtiles de tempus de recùperu congruet sa prima fache de sa gioghera.

Si torrat a campu cun s’abba pioana chi afortit ma su terrinu de su Nespoli rezet. A su de 48 unu anda-li-torra galanu intra Biancu e Ragatzu; Tanielleddu torrat sa bòcia a su trescuarteri tataresu chi fuit lestru ma enit frimmadu dae Disanto pròpiu a su mamentu de tirare. A su de 56 su berchiddesu Arras enit giamadu a fora dae Pagliuca chi che mintet a campu De Paoli. Babbi si dat ita-fàghere pro israighinare bòcias dae sos mesanos senesos, e sas faladas de su Siena devenint duncas de mancu perigulosas, daghì s’iscuadra olbiesa in campu est como pius cumpata.

Ma sos òmines de Pagliuca si faghent ischentiddosos: a s’ora ispacada de giogu sos duos atacantes de su Siena si chircant in s’áera terranoesa, ma su colpu finale non arrivit e sa bòcia si perdet a fine campu. Chimbe giros de rellozu e dae mesu de áera Buglio iscònchinat seguru, ma Gelmi trimbat su cartellinu: parada de campione e sa bòcia finit alta.

A su minùtile 67 Occhiuzzi cheret dare briu a s’atacu e chircat de artzare su baritzentru: Contini leat su postu de Babbi chi in su segundu tempus at currioladu meda, e Incerti dat su cambiu a Emerson. Como giogamus a bátoro in dae-segus, in unu 4-3-1-2 chi a bortas paret unu 4-2-3-1, ispètzie daghì a su de 73 intrat Boganini e lassat su terrinu de giogu Minala. Cun Zanchetta chi dat su càmbiu a La Rosa, pro dare pius invèntu a sa mesania. Ma est Gelmi chi torrat a dare isermore: a su de 76 minùtile Disanto ischirchinat dae fora, su portieri nostru fàghet unu meràculu e salvat sos biancos.

A deghe minùtiles dae sa fine intrat Occhioni e essit Biancu. A su de 82, Contini falat lestru imbucadu dae Ragatzu, si bufat Lanni ma s’atragat tropu e inluscigat a su mamentu de tirare a porta, innanti a su portieri. Non b’at áteras trinnigadas in campu, mancari mai-cantu tempus annantu. Sa gara, istrobbada dae su tempus malu, finit a su minùtile 97, cun un aparinada chentza retes chi podet bandare puru bene.

Unu segundu tempus pius atrividu pro sos biancos fàghet pensare in bonu pro su tempus bennidore. Ancora non semus perfetos in su pùnghere, ma a rafiare bi la faghimus cun bonu profetu.

SALA GIORNALISTAS

Roberto Occhiuzzi si mustrat cuntentu a fine gara: “Su puntu de oje est su mèritu pro éssere resessidos a nos azeretare, daboi de 18 minùtiles in ue non semus istados capaces a leare sas mesuras de su Siena. Daghì bi l’amus fata, semus istados bravos a nos impònnere nois in su giogu e non issos. Devimus mezorare a atacare intro de áera, ma sas duas ocasiones de Minala e Contini b’enint dae faladas abberu bene fatas. Dono sos cumplimentos a sos ómines mios, bessire dae campu cun sos plàusos de sos sustenidores nostros cheret nàrrere chi est s’andamenta giusta”.

Federico Zanchetta puru bidet in bonu: “S’aparinada de oje andat bene, deviamus mustrare de non éssere sos de Rimini, e mancari non siemus partidos bene, semus essidos a bellu a bellu fatende giogu e apende ocasiones”.