S’Olbia cambiat marcia

Ispòstu s’istadiale sos sardos abbèrint sa janna ‘e s’isperu ‘e cabidanni. 

Dae sa tuccada si cumprendet luego chi Ragatzu est semper presente, ma isse no est pius in solitudine. Sos bàrdianus de su faru leant sa partida a manu tenta cun balia e personalidade comente no s’ìdiat dae meda tempus e s’Imolese chircat de cumprendere e remediare comente potet.

Contini mustrat luego chi isse no cheret essere in s’apposentu pro bellesa. Si giogat mesa defesa e domo e isbatzinat a cantu bessit. Rossi si salvat comente potet, sun passados solu tres minutos. Colant solu pagos minutos infatu e bi proat Ragatzu: profitat de sa defesa ‘e domo unu pagu abucallotada, si lampat subra sa bocce che unu falchittu, solu si presentat innanti a Rossi, liberat una resoltzada segura, sa boccia carignat su palu ‘e linna e si perdet in fundu ‘e campu.

Biancu puru si faghet bidere a su minutu 16, rupit s’area in lestresa e cun su pè manchinu crossat unu cumbidu galànu, Incerti che pigat a chelu, ma s’isconchinada no agatat sa porta. Olbia però maghinat giogu e semenat oriòlu in sa defesa imolese. Imolese bi proat tando a su minutu 22 cun atzione insistida a s’ala manchina de sa defesa olbiesa, attit un’isconchinada de Stijepovic chi si perdet alta, subra sa traversa. Cussu e pagu àteru pro sos meres de domo e subra su 0-0 isponet su primu tempus.

Su segundu tempus naschet male. Sueva si procurat sa segunda brigada dae s’arbitro, cando aiat leadu chena gurpa sa prima e devet lassare su campu e sos cumpantzos in deghe. Pagu mudat sa sinfonia e colados 20 minutos Olbia torrat a agatare sa rete: Contini domat unu lanciu longu tuccadu dae Travaglini, trampat sa defesa cun classe e lestresa in s’ala manchina e incrociat cun su destru chena lassare iscampu a su bardianu ‘e domo. Imolese no cheret perdere in domo sua, faghet gherra fintzas a sa fine e a su minutu 95 s’acurtziat a su pareggiu, s’area sarda est una lutta de omines in sa chirca de sa boccia, sas panchinas sunt ritzas de oriolu, su tiru chi rùpit a sa fine tocat sa rete, ma a banda a foras.

S’arbitro frusciat tres bortas e Olbia ponnet in bertula tres puntos de oro, c’abberint sa janna a una die noa.