S’Olbia non faddit unu passazu importante

Fit una gara de fundamentu pro cumprèndere su rolu de sos biancos in custu campionadu. E s’esàmine est istadu coladu: postu de oto in sa lista de mèritu, duncas como partit un àtera istòria, pius fascinosa ca punnat a carchi cosa pius de sa salvesa. 

In porta torrat Ciocci, innanti a isse Brignani, Boccia e Travaglini. Sos bàtoro de mesania sunt Pinna, La Rosa, Lella e Pisano. Pro ofèndere Biancu a daesegus de Ragatzu e Udoh. S’Olbia partit allinnada, sa manovra est lenta e sa Lucchese paret pius briosa. A su de 6 minùtile est Corsinelli chi chircat sa bia de sa porta dae punitzione, ma sa mìria est alta. Chimbe giros de rellozu e Ciocci essit male subra un atacante toscanu, chi colpit de conca, ma pro fortuna sa bocia che colat serente a su palu e finit fora.

Sa Lucchese paret pius animosa, e difatis pro serare una falada de sos biancos tocat de aisetare su de 16 minùtile: Pinna acatat Udoh chi abberit a manca pro Ragatzu. Tanieleddu proat su tiru a paris-terra, ma congruet a fundu-campu, a sa dresta de su portieri toscanu. Tres minùtiles e bi proat Biancu dae fora de áera, su tiru est lentu ma perigulosu. Fora custu puru. Sa partida si tràjinat in manera istraca, s’Olbia non resessit a tèssere su giogu, cun sa Lucchese chi impitat meda su fallu táticu in mesania. Pagas ocasiones, peruna parada dae ambas-duas partes. Pro bìdere cosa de remeju si devet arrivire a su de 41: fallu chena frusciadu subra a La Rosa, sos toscanos bolant a cherra a sa porta bianca, sa bocia arrivit a Semprini chi dae fora tirat ma non indèvinat s’ispiju defesu dae Ciocci. Est s’ultima falada de unu primu tempus de pagu allòddiu.

Torrados sos omines in campu, sa Lucchese paret torra pius atrivida: sùbbidu, dae una bocia pèrdida dae Ragatzu, partit lestra una falada chi paret pius de rugby chi non de fùbalu. Sa defesa sarda cumparit intumbida, ma sos giogadores toscanos che acumpanzant sa bocia a fundu de campu a bonu insoro. Sa barra toscana durat pagu. A su minùtile 50 s’Olbia si che colat: sa bocia arrivit a Udoh, palas a sa porta, chi la aporrit a Ragatzu chi dae manca si trobojat e cun una bella girada a bolu mìriat a dresta. Coletta est bàtidu e sa retza si únfiat. 

Sa Lucchese si frimmat inoghe. A su de 52, Ragatzu acatat Pinna chi bolat in contra-giogu. Sa bocia in finitia arrivit a Biancu chi dae sa manca mìriat tropu altu. Tres minùtiles e dae punitzione bi proat Ragatzu. Su tiru est dèbile, ma a su mancu amus bidu sa prima parada de sa gara. A su de 58, Udoh de conca dae tiru dae sa banderedda, non ponet intro pro pagu.

Ancora s’Olbia a su de 59: falada de sos biancos chi si proant a liberare pro su tiru, ma ne Ragatzu ne Biancu bi resessint, su trescuarteri tataresu tando che la ponet in áera pro Udoh chi guasi dae terra intzichit de conca, ma sa bocia si artziat tropu e che finit subra sa traessa. Unu giru de rellozu e Ragatzu caentat sas guantes de Coletta: tiru bene sestadu ma su portieri toscanu bi giompet. Su campione de Cuartu bi torrat a proare chimbe minùtiles a pustis, ma sa mìria est ancora alta. Ciocci si imbrutat sas guantes a su de 67: Nannini intzichit a colpu seguru, su portieri terranoesu carignat sa bocia ponzende-che-la subra sa traessa.  

Arrivit su mamentu de carchi cambiu, e Canzi nde faghet tres: intrat Chierico pro Lella, Arboleda pro Pisano e Emerson pro Pinna. Travaglini altziat in mesania lassende su postu in prima linea a su defensore brasilianu. Sa Lucchese proat a fortzare sa gioghera, ma est semper s’Olbia chi si mustrat perigulosa. Arboleda insulciat sa fascia dresta e ponet isconcuassu in sa defesa toscana: a su de 79 sa bocia arrivit a Travaglini, chi non colpit bene e Coletta parat. Unu minùtile a pustis, est Chierico chi servidu dae su colombianu ischìrchinat seguru e leat su corru mànchinu de sa porta, a portieri bàtidu. Ancora s’Olbia: a su de 89 Chierico faghet una abbertura de campione pro Biancu, chi servit una bella bocia a Udoh, ma s’atacante sardu mìriat a su chelu. A s’ultimu minùtile est Collodel pro sa Lucchese chi proat a aparinare sa gara, ma su tiru essit a sa dresta de Ciocci. Su tempus de bidere Brignani a terra intzichidu cun unu carche dae su portieri toscanu, altziadu in áera bianca pro proare s’ùltima ocasione e s’árbitru che mandat totus a domo. 

S’Olbia non faddit sa prima de s’annu, torrat a abbratzare a Ciocci, Arboleda e Chierico e proat a dare unu sabore pius durche a su campionadu sou. Semus in altu e bi cherimus istare! A mastru Canzi s’ingàrrigu de nos fàghere inlutzigare sos ojos. 

Roberto Mette, Amistade