S’Olbia pelded’ duos puntos meritados

LIMBA COMUNA

Contr’à sa’armada Entella s’iscuadra terranoesa narat chi nèmos est superiore a su coro biancu. Giompidu su minutu numeru 13, sos olbiesos dichiarant s’intentu: Biancu si liberat e isbatzinat a cantu potet, sa defesa ‘e s’Entella li ponet su muru innanti, sa boccia respinta ruet in pès a Corti, chi no bi pensat meda e mirat sa porta, su bardianu no potet pius nudda, tando bi pensat sa linna de su palu manchinu a parare su tiru, ma sa gara at già unu tema.

S’isconchinada de Bellodi, unu minutu infatu carignat sa traversa deviada dae Borra, su bardianu istrantzu, chi a su minutu 18 tancat s’aidu de sa porta a Ragatzu, su Mastru de Quartu. Sa rete olbiesa paret in s’aera, ma est Entella a violare su saccu: Ramirez in sa prima atzione de s’Entella donat s’idea a Merkaj chi in sa mesania de s’area no perdonat, a su minutu 24. Che passat solu unu minutu e Dessena si faghet logu in sa mesania de s’area istrantza, sa defesa lu potet solu istrampare: rigore. Ragatzu si leat sa responsabilidade e faddit, sa boccia si perdet inforas, in cara de sa curva ‘e domo chi li donat su coraggiu meritadu.

E isse no deludet s’isperu, in su segundu tempus a su minutu 70 si giogat mesa defesa istrantza e pintat un assist de oro pro Travaglini, chi sighit s’idea e de manchinu no faddit: prima rete de s’annada pro isse, 1-1. S’Entella faghet a comprendere chi est bennida in Sardigna pro binchere e sighit a attacare, ma s’apparinada no est su bisu de sos sardos e sas boccias no mancant: Sposito sarvat sa porta Olbiesa a su minutu 94 cun unu meraculu, ma s’urtima occasione est terranoesa: Nanni, Contini, La Rosa chi li torrat sa boccia. A Contini li mancat unu centimetru, pro resessire a binchere sa partida e s’arbitro frusciat sa fine. 

Bella partida, como tuccamus a Ancona.

Mario Bua Capitta – Consulta Terranoesa

——

LIMBA TERRANOESA

Contr’a s’almada Entella, s’isquadra terranoesa mustrad’ chi nudda poded’ superare su coro biancu nostru. A su 13mu minutu, cunfilmana sa volontade insoro. Biancu si liberad’in s’area Entella, tirad’ cun folza, ma sa difesa faghed’ muru e respinghed’ su pallone, chi falad’in pese a Corti, chi chena bi pensare meda, a portiere iscunfittu, istampad’ su pallone in su palu sinustru, si pelded’ s’occasione ma sa paltida prumittid’ bene. Unu minutu pius taldu, Bellodi, de conca isfiorad’ sa travessa, deviada dai Borra, su portiere istranzu, chi a su 18mu minutu parad’atteru tiru de Ragatzu, su mastru quartesu. 

Sa rete olbiesa pared’in aria ma est’ s’Entella a signare in sa prima azione in attaccu :Ramirez, cun unu passazu foltunadu, in area selvid’ su pallone a Merkaj chi no peldonada e signad’ sa rete a su 24mu minutu. Olbia 0- Entella 1. Che passad’ solu unu minutu, Dessena cun abilidade, si faghed’ logu in s’area istranza, sa difesa no poded atteru che lu mandare a terra cun folza. S’arbitro cunzedid’ giustamente su rigore! S’ingarrigad’ de lu tirare Ragatzu, chi a mala ia, lu Faddidi, su pallone andad’fora ‘e sos palos, in cara de sa culva de sos tifisos olbiesos, chi li Faghen’ mustra de coraggiu.

Isse, in su sigundu tempus, lis torrad’ s’isperanzia. In su 71mu minutu, s’iscaltad’ mesa difesa istranza, cun d’unu passazu de oro a Travaglini, chi cun d’unu bellu tiru de sinistru, signad’ su pareggiu: 1-1. Pro isse sa prima rete de s’annu. S’Entella no sarrendede, pro chi chered’ binchere. Sighid’ cun aziones de attaccu, ma Sposito salvad’ su risultadu paritzos voltas’. A su 94mu minutu, in tempus de ricuperu, s’Olbia, pro miraculu no signad’ sa sigunda rete de sa vittoria: Nanni, Contini, La Rosa, su pallone torrad’a Contini, a unu passu dai sa polta,ma pro unu pilu, no toccad’ su pallone. Si pelded’ un’occasione manna pro ‘inchere sa paltida.

Custa est’ s’ultima azione e s’arbitro frusciad’ sa fine ‘e sa paltida. Bella sa prestatzione des’Olbia, e prumittid’ bene a la sighire cun s’Ancona.

Antonello Serra – Consulta Terranoesa