S’Olbia ruet torra in domo sua

Duas giogheras in su Nespoli in su mese de frearzu, duas rutas. S’Olbia faghet giogu ma non pienat sa busciaca, sutzèdidu mèrcuris passadu cun s’Ancona, cumbinat custa domeniga puru cun s’Entella! Canzi mudat carchi cosa in campu, daghì est frimmu pro tres turnos La Rosa. In porta semper Ciocci, defesa a tres cun Brignani, Pisanu e Emerson, in mesania Giandonato e Lella sunt ajuados dae Chierico, cun Travaglini e Arboleda a costazu insoro, atacu in sos pes de Ragatzu e Udoh.

Comente a semper sos biancos partint che coete. Luego, Emerson ponet in àera, ma Silvestre imbolat a fora. A su de 11 minùtile unu tiru tressu dae sa manca acatat prontu Lella in àera. Su mesanu sardu colpit de conca ma mìriat fora. S’Olbia sighit a apretare ma sa defesa ligure at pagos anneos, finas a su de 22, minùtile chi bidet s’Entella perigulosa: Rada dae manca ponet unu traessale in àera, arrivit Dessena chi isparat altu.

Est s’avisu de su gol de sos furisteris, chi arrivit bàtoro minùtile a pustis: Mercaj dae s’oru de manca ponet in àera pro Silvestre. S’argentinu – chi amus bidu paritzos annos in Serie A cun Inter e Sampdoria – tirat ma sa defesa bianca si salvat, sa bocia suprit a Schenetti chi dae fora de àera non lassat iscàmpiu a Ciocci.

S’Olbia est azigu intumbida: a su de 31 Magrassi proat su tiru dae fora, ma Ciocci parat chena pistighinzos; unu minùtile e ancora Schenetti chircat sa bia de su gol, ma su tiru sou est fora. In bonora, a su de 32 sos terranoesos giompent a s’aparinada: falada dae manca, tiru traessu de Travaglini, sa bocia a Arboleda chi – innanti de retzire unu colpu – resessit, in isluscigada e cun azigu de fortuna (tocat unu defensore de s’Entella), a servire Udoh chi daeinnanti a Borra lu brassamat. Semus 1 a 1. 

Sos òmines de Canzi leant animu e a su de 36 Lella est aterradu serente a s’àera ligure. Ragatzu batit ma intzichit sa barriera. Unu minùtile a pustis e Arboleda, servidu dae Giandonato, ponet in s’àera unu tiru traessu perigolosu chi acatat però sas guantes de Borra. Ateru fallu subra a Lella a su de 38, custa borta a sa fache dresta. Batit Emerson ma leat sa barriera, sa bocia lis torrat in pes, ma su brasilianu ponet altu. 

A su de 41 su brasilianu intrat tropu tostu subra a Dessena, sardu de Benetutti chi at ancora sa casaca de su Casteddu atacada a sa pedde. Ammonidu, Emerson chi aiat già sa difida, at a brincare sa gioghera a Gubbio. Punitzione de Schenetti, chi ponet intro de s’àera ma sa bocia che ferit in s’oru mànchinu de su campu. Su tempus de bìdere unu bellu traessale de Travaglini pro Udoh chi finit cun unu fallu subra a Silvestre frusciadu a su atacante sardu e sas iscuadras andant a si pasare.

Sa segunda fache de sa gioghera comintzat cun Arboleda chi insulciat in sa dresta, bocia a Udoh chi colpit repentinu, Borra ribatit a bratzos aunidos, a tipu pallavolista. A su de 53 minùtile Pisano resolvit una falada perigulosa de sos ligures, ponzende a fundu de campu. Dae sa banderedda batit Schenetti chi acatat sa conca de Merkaj, chi colpit chena istrobbu perunu dae sa defesa bianca. Bocia in gol e s’Entella andat a su 2 a 1. 

Canzi a su de 61 detzidit pro dare pius briu a s’atacu: essit Chierico e Biancu intrat pro fàghere su trescuarteri. Sa gara non mudat s’andamenta e tando – a su de 68 – ateros duos cambios pro sos cadduresos: bessint Brignani e Giandonato, intrant Pinna e Ladinetti. Travaglini falat in defesa a dresta de Pisano e Emerson, Pinna leat su postu sou in mesania, in s’oru mànchinu.

Arboleda a su minùtile 71 dae dresta mintet unu tiru tressu, tocadu dae unu defensore ligure arrivit a Borra chi parat tranchillu. Duos giros de rellozu e sos biancos torrant a aparinare: Ragatzu dae dresta proat unu tiru traessu pro Udoh, chi non bi giompet. Sa bocia sighit etottu su tretu sou finende intro, a sa dresta de unu assustu Borra! S’Olbia bi creet: altziat su baritzentru de carchi passu e ballanzat unos-cantos tiros dae su corru de su campu, chi dant carchi anneu a s’Entella. Canzi proat a misciare sas cartas, mintende-che Saira e Occhioni pro Udoh e Lella, e luego sos biancos andat a curtzu a sa de tres rete: falada totu sarda, Ragatzumovet sa bocia pro Biancu, chi passat a Ladinetti. Su mesanu sardu la torrat a Ragatzu chi cun unu tiru a giru leat su palu pienu.

A su de 89, fallu de Occhioni serente a s’àera bianca. Punitzione de Palmieri pro sa conca de Lescano chi però mìriat a fora. E unu minùtile a pustis, una ranchida befa pro s’Olbia: bocia in mesu de Morosini pro Merkaj chi unfiat sa retza. In su tempus de recùperu nudda sutzedit e sos biancos de Sardigna devent ingùllere un àteru bucone alluadu in giru de chimbe dies. 

Roberto Mette, Amistade

Condividi l'articolo

Scopri il nostro shop

Mostra il tuo orgoglio per i nostri giocatori e renditi protagonista del gioco.

Ultime notizie

comunicato

La società Olbia  Calcio comunica “di aver sollevato il Sig. Marco Gaburro dall’incarico

comunicato

L’Olbia Calcio è lieta di annunciare il consolidamento della partnership con Geasar,

comunicato

La società Olbia  Calcio comunica “di aver sollevato il Sig. Marco Gaburro dall’incarico

comunicato

L’Olbia Calcio è lieta di annunciare il consolidamento della partnership con Geasar,

Scopri il nostro shop

Mostra il tuo orgoglio per i nostri giocatori e renditi protagonista del gioco.