S’Olbia trampat su Pontedera mudende traggiu

Pustis de su meritadu paris cun Teramo, Olbia narat chi semus crescende in autoridade e sabiesa, donende unu sighidu a sos resultados, chi fintzas a como mancaiat unu pagu.

S’Olbia mudat mudulu de giogu e passat a su 3-4-1-2, Van des Want in porta, cun Boccia in difesa umpare a Brignani e Emerson, a destra e a manca giocant Pinna e Travaglini, cun Chierico e Lella a pedalare in sa mesania, Biancu tra sa mesania e s’atacu, cun ninnanti una de sas metzus copias de sa serie C: Ragatzu e su leone King Udoh.

Sos tuscanos de su Pontedera rispondent cun unu 3-5-2, in porta giogat Angeletti cun Matteucci, Espeche e Bakayoko in defesa, Regoli, Barba, Caponi, Catanese e Perretta in sa mesania, cun Benedetti e Magnaghi a guidare s’atacu.

Sos sardos tuccant cun animu balente, Chierico luego a su primu minutu impignat su bardianu istrantzu. Pagos minutos e Udoh, su leone, mustrat sos dentes. Lanciu longu e galanu de Biancu chi aberrit sa defesa istrantza, su bardianu bessit e paret in vantagiu pro sa presa e sa bocia, ma Udoh bi cret e est meda pius lestru de sa defesa tota, che brincat Angeletti e atzumbat cun s’urtim’omine in defesa de sa porta boida. Giogadores e amigos in tribuna preguntant su rigore, “A noi rigores pagos!” abboghinat unu tifosu dae sa curva…

Pustis, pianu, pianu su Pontedera che pesat sa linea de mesania, obligende Olbia a sa defesa. E Olbia lu faghet bene meda, tantu chi Van de Want tocat pagas boces e lu faghet semper cun maestria.

Su paregiu paret su destinu de sa die, su primu in domo nostra, ma su coro si cojuat cun sa rejone ch’ammentat de no leare retes, innanti ‘e totu. E a sa fine accudit su premiu, benennidu e galanu, chi faghet immentigare sa povertade d’emotziones, de una partida fea. 

Emerson, comente semper isparat su manchinu intro a s’area dae su corner, su cross galanu che brincat sa defesa issoro e s’atacu nostru. Cando sa bocia comintzat a calare bi bensat Ragatzu a la furriare in s’aera.Dae manca a bolu isbatzinat intro a sa rete e su bardianu potet solu abbaidare, mudu su giompere de su destinu. Est su minutu 90.

Carcunu como in tribuna comintzat a timire sa risposta de sas feras de Pontedera, ma sos piseddos non tremant: Lella, Ragatzu e Udoh si buffant sa difesa cun sa classe e sa lestresa, s’assist de su leone in sa mesania de s’area est unu turrone e Renault, bintradu dae pagu tempus no si la perdet e giompet su 2-0.

Su minutu est sue 93 e sa die est cussa de sa festa manna, pro Olbia e sa Sardigna intrea.

Mario Bua, Amistade