Sos diciosos pigant a chelu

Colados mancu duos minutos, sa Reggiana faghet luègo intendere chi’est su mere de domo e de su girone intreu: Pellegrini tenet su cross imbiadu dae s’ala destra, ma s’isconchinada morit in sos bratzos seguros de Gelmi. Sos sardos no si lassant impressionare meda e Mordini, servidu da Brignani, si liberat bene de sa defesa reggiana e isbatzinat a cantu potet. Sa boccia faghet su ‘entu a sa linna ‘e sa traversa, avelguada dae su bardianu ‘e domo.

Ses minutos in fatu, a sue 28, tocat a Ragatzu: La Rosa furat boccia in sa mesania, la donat a Biancu chi la domat cun bellu traggiu e liberat su mannu terranoesu. Ragatzu si buffat mesa defesa e liberat una resortzada a girare, inue su bardianu no potet mai giompere. Sa boccia carignat su palu ‘e manca e morit in foras. Lanini, bintradu in campu dae pagu, bi proat a su minutu 38, chena oriolare meda Gelmi. Sa Reggiana mantenet in manu sa briglia de su giogu, ma Olbia controllat bene meda e gasì isponet su primu tempus.

Su partziale narat duos paris, ambas balantzant su matessi numeru de occasiones.

In su segundu sa Reggiana tuccat cun balia noa, Pellegrini s’accurtziat a sa rete olbiesa, su tiru a bolu benit muradu in sa linea ‘e porta dae sa defesa sarda. In sa matessi giogada bruscat Gelmi chi infortunadu devet lassare su campu. In logu sou bintrat Van Der Want, paris cun Renault e Zanchetta e s’Olbia torrat a mustrare dentes: Biancu faeddat cu Ragatzu ch’imbiat unu cumbidu galanu in sa mesania de s’area reggiana, Contini che brincat s’omine de sa contra e s’agatat solu innanti a su bardianu e domo, chena resessire a centrare sa porta. Battor minutos infatu est Bellodi che de conca minetat sa Reggiana. Sa boccia si torratat a perdere in foras. 

Cigarini e cumpantzos cherent binchere e sighint a luttare fintzas a su minutu 99, ma Van Der Want si faghet agattare prontu e sa defesa custa orta no si lassat trampare: Reggiana-Olbia 0-0, un passu minore innantis, chi meda balet.

GLOSSARIU

Diciòsu – felice, beato, positivo

Pigàre – salire, montare

Tràggiu – portamento, profilo

Ispònnere – cessare il lavoro, terminare

Resòrtzada – rasoiata o coltellata

Bruscare – soffrire un incidente, ricevere una batosta