Su giogu nostro si faghet emotzione

Sa die pariat naschida male e solu s’Entella in deretu de paschere.

Colados 9 minutos, una parada male sestada de Ciocci, che sinnu de unu destinu già printadu, abberiat sa partida. Bi pensat Mancini de conca a a avvisare sos padronos de domo chi oe, no at a essere una passizada. Passant solu 5 minutos e semus unu a unu.

Pustis però si bidet solu s’Entella. Giogant lestros, s’agatant a memòria, parent de àteru pianeta. E sos nostros? Sos piseddos si defendent chirchende unu portu seguru, unu portu cuadu, guasi timorados. E s’Entella profitat pro faghere ateras duas retes e che tancare sa partida intro sa cascia. Semper isse, semper Nenardu Morosini, chi giompet a sa dopieta, gratzias puru a su bardianu nostru Ciocci, chi cun duas presas difetosas, abberit sa gianna de su faru. De seguru est in dèpidu cun sa bona sorte. Tres a unu, cando s’arbitru frusciat sa fine de su primu tempus.

Ma noi semus fizos de sos gigantes de Monte Prama e Tanielle Ragatzu, mancari minudu est unu de cossos. Tucat Emerson chi cun su mànchinu sou connotu, che brincat sa mesania, Udoh su leone furat sa bocia a su marcadore sou e la lassat a Lella chi antecipat Cicodi e cun drestu potente isbatzinat in porta. Paroni no resessit a frimmare sa bocia e Tanielle b’est. Ben’impostadu no perdonat su gardianu, che la tzacat a intro e liberat sa partida. Est su minutu 48 e mudat s’animu de s’Olbia chi comintzat a bi torrare a crere.

Semper isse semper Tanielle Ragatzu minetat s’Entella, nende chi sa gherra non est galu finida. Su palu a manu de intro salvat su bardianu, Paroni chi nudda aiat potidu. S’Entella cumprendet chi sos piseddos de s’Olbia non cherent perdere e si defendet bene, ma a su minutu 87, mudat su caminu de su destinu. Semper dae su pè mànchinu de Emerson tucat sa riscossa. Su lanciu longu giumpat totu su campu, Udoh in s’ater’ala trampat Paroni e cun tocu lebiu che lu brincat. Semus tres a tres e in cue isponet sa partida. 

Olbia est iscuadra giovana e potet, devet galu mezorare, comente ammentat mastru Canzi. 

Ma como totu ischint chi bìnchere s’Olbia no at a essere giogu de “pitzinnos puzones”, pro niune. E a sas fines l’ammentat puru Alessandro Marino, su presidente.

Mario Bua, Amistade