Su risultadu faeddat a sa sola…

Dae su minutu 4, Lella sbatzinat dae su limite de s’area impegniende su portiere istrantzu, fatende a comprendere chi isse e Olbia, oe ant paga gana de burlare.

Beru chi sa Carrarese rispondet unu minutu in fatu, cun Pasciutti, chi donat valore a sa parada ‘e Ciocci, chi balet una rete. Faghent gasi a comprendere chi no aiant intentziones bonas. In panchina paris cun su mastru Totò di Natale, si potiat notare puru sa presenzia de s’ex casteddajiu Giannetti.

Ma sunt bastados 15 minutos a sos gadduresos pro ponnere in giaru chie cumandat in campu. Travaglini servidu dae mancini, crossat in mesu ‘e area una bocia galana. Su cumbidu est tropu bellu pro lu perdere in debadas…bi pensat su numeru sette.  Lella che pigat  a chelu e cun sa conca lampat su tiru a inue su bardanu istrantzu no potet giompere mai. Semus 1-0 e pro sos carraresos incominztat sa pigada.

Ragatzu no si potet parare, fuit a manca e donat un’atera bocia a sa conca de su numeru sette, chi no perdonat pius a niune e pro sa segunda orta anticipat totus in s’area prena che un’istatzione: 2-0 e festa manna, in campu e foras. Semus galu a su minutu 39.

Niune ischit ite mudat e comente tra su primu e su segundu tempus, ite tiad poder aere nadu Di Natale a sos suos,  ma pro sa carrarese paret partida noa…de seguru giogat cun animu nou. 

Bramante bintradu in su segundu tempus attacat su logu, lestru che lepere, crossat a mesania de s’area, Emerson cun su pes sou manchinu proat a liberare, ma sa bocia l’iscradiat e faghet un eurogol in sa porta sua, ammentende Niccolai. Nudda potet Ciocci. 2-1 e sa partida paret torrende a naschere. 

 Ma est solu un’illusione minore. Sa partida s’ischidat beru, ma Olbia no si lassat binchere dae sa timoria. Dae sa bandela crossat Giandonato comente ischit fagher isse, sa bociat jumpat tota s’area istrantza, Pisano de conca la furriat a mesu, est un assist pretziosu pro Simone Mancini, chi semper de conca no faddit. Su rellotzu sinnat su minutu 56. Semus 3-1 e Olbia tenet como sa briglia de su giogu e agatat s’animu perdidu.

Prima Palesi carignat su palu cund’un’isbatulada dae fora ‘e area, chi potiat essere istada una maghia de ammentare ma bi pensata Brignani, unu minutu in fatu. A bolu e semper de conca lassat su bardianu, isconsoladu.

Pasciutti  devet faghere sa docia prima de isponnedere, ca pro resessire a frimmare sa balia de Lella s’inventat una mossa de Kung-fu. Ruju deretu. Pustis de pagu bessit isse puru su sette de s’Olbia, giamadu a torrare in panchina dae matru Canzi, pro potes godere de sos meritados aplausos. 

Su piseddu mustrat una creschida costante, naschet s’isperu pro isse e pro Olbia, tzitade giovana.

Mario Bua, Amistade